តម្លៃទំនិញប្រើប្រាស់របស់សហរដ្ឋអាមេរិក បានកើនឡើងតិចជាងការរំពឹងទុក នៅក្នុងខែកុម្ភៈ ប៉ុន្តែភាពល្អប្រសើរនេះ ទំនងជាមិនមានរយៈពេលយូរអង្វែងនោះទេ ដោយសារការដំឡើងពន្ធខ្ពស់លើការនាំចូល អាចនឹងធ្វើឲ្យតម្លៃទំនិញភាគច្រើនឡើងកាន់តែខ្ពស់ នៅប៉ុន្មានខែខាងមុខ។

កាលពីថ្ងៃពុធ (ទី១២ ខែមីនា) ការិយាល័យស្ថិតិការងាររបស់ក្រសួងការងារអាមេរិក បានឲ្យដឹងថា សន្ទស្សន៍តម្លៃទំនិញប្រើប្រាស់ (CPI) បានកើនឡើង ០,២ភាគរយ កាលពីខែមុន បន្ទាប់ពីហក់ឡើង ០,៥ភាគរយ នៅក្នុងខែមករា។ ក្នុងរយៈពេល ១២ខែ រហូតដល់ខែកុម្ភៈ CPI បានកើនឡើង ២,៨ភាគរយ បន្ទាប់ពីឡើងដល់ ៣,០ភាគរយ ក្នុងខែមករា។ អ្នកសេដ្ឋកិច្ចដែលត្រូវបានស្ទង់មតិដោយសារព័ត៌មាន Reuters បានព្យាករថា CPI កើនឡើង ០,៣ភាគរយ និងហក់ឡើង ២,៩ភាគរយ បើធៀបនឹងរយៈពេលដូចគ្នា ក្នុងឆ្នាំកន្លងមក។

របាយការណ៍អតិផរណាពេញលេញដំបូងនៃរដ្ឋបាលរបស់លោកប្រធានាធិបតី Donald Trump នៅតែឡើងខ្ពស់ ដែលអ្នកជំនាញសេដ្ឋកិច្ច លើកឡើងថា មិនស្របនឹងគោលដៅ ២ភាគរយរបស់ធនាគារសហព័ន្ធនោះឡើយ។ 

លោក Trump នៅដើមខែនេះ បានបង្កឲ្យមានសង្រ្គាមពាណិជ្ជកម្ម ដោយដំឡើងពន្ធលើទំនិញនាំចូលពីប្រទេសចិនដល់ ២០ភាគរយ និងបន្ថែមពន្ធថ្មី ២៥ភាគរយ លើទំនិញនាំចូលពីកាណាដា និងម៉ិកស៊ិក មុនពេលសម្រាលវិធានការនេះ ហើយផ្តល់ការលើកលែងរយៈពេល ១ខែ សម្រាប់ទំនិញណាដែលបំពេញតាមច្បាប់ដើមក្រោមកិច្ចព្រមព្រៀងពាណិជ្ជកម្មសហរដ្ឋអាមេរិក-ម៉ិកស៊ិក-កាណាដា៕