ប្រភពសន្តិសុខអង់គ្លេស បានអះអាងថា សហរដ្ឋអាមេរិកត្រូវបានគេរំពឹងថា នឹងព្រមានវិមានក្រឹមឡាំងថា ខ្លួននឹង «បំពាក់អាវុធដល់អ៊ុយក្រែនឲ្យកាន់តែមានប្រសិទ្ធភាពជាងមុន» ប្រសិនបើរុស្ស៊ីមិនទទួលយកបទឈប់បាញ់រយៈពេល ៣០ថ្ងៃភ្លាមៗទេនោះ។

ចំណាត់ការនេះកើតមានឡើងបន្ទាប់ពីអ៊ុយក្រែន បានប្រាប់ថា ខ្លួនបានត្រៀមរួចជាស្រេច ដើម្បីទទួលយកបទឈប់បាញ់ជាបណ្តោះអាសន្នជាមួយរុស្ស៊ីរយៈពេល ៣០ថ្ងៃ ដែលត្រូវបានស្នើឡើងដោយសហរដ្ឋអាមេរិក បន្ទាប់ពីមានកិច្ចចរចា នៅប្រទេសអារ៉ាប៊ីសាអ៊ូឌីត។

រដ្ឋមន្ត្រីការបរទេសអាមេរិក លោក Marco Rubio បាននិយាយថា លោកនឹងបង្ហាញសំណើនេះដល់ប្រទេសរុស្ស៊ី ហើយថា «ឥឡូវនេះ ការសម្រេចស្ថិតនៅលើពួកគេ» តែទីក្រុងមូស្គូ មិនទាន់ធ្វើអត្ថាធិប្បាយជាសាធារណៈលើបញ្ហានេះនៅឡើយទេ។ ចំណែកប្រធានាធិបតីអ៊ុយក្រែន លោក Volodymyr Zelensky បានបញ្ជាក់ថា ពេលនេះ វាគឺអាស្រ័យលើសហរដ្ឋអាមេរិក ក្នុងការបញ្ចុះបញ្ចូលរុស្ស៊ីឲ្យយល់ព្រមតាមសំណើ «វិជ្ជមាន» នេះ។

យ៉ាងណាក្ដី ប្រភពសន្តិសុខជាន់ខ្ពស់មួយរូប បានប្រាប់សារព័ត៌មាន National Security News ថា ប្រធានាធិបតីអាមេរិក លោក Donald Trump នឹងបញ្ជាក់យ៉ាងច្បាស់ៗទៅកាន់ប្រធានាធិបតីរុស្ស៊ី លោក Vladimir Putin ថា លោករំពឹងថា រុស្ស៊ីនឹងចុះហត្ថលេខាលើកិច្ចព្រមព្រៀងនេះ។

ប្រភពនោះបានសង្កត់ធ្ងន់ថា «លោក Trump នឹងមិនចង់ឲ្យកិច្ចព្រមព្រៀងនេះបរាជ័យនោះទេ។ លោកនឹងបញ្ជាក់យ៉ាងច្បាស់លាស់ទៅកាន់មេដឹកនាំរុស្ស៊ីថា លោករំពឹងថា នឹងមានកិច្ចព្រមព្រៀងកើតឡើង។ ប្រសិនបើលោក Putin បដិសេធមិនឈានដល់កិច្ចព្រមព្រៀងទេនោះ លោក Trump នឹងបញ្ជាក់យ៉ាងច្បាស់ថា សហរដ្ឋអាមេរិកនឹងគាំទ្រអ៊ុយក្រែន ដែលអាចមានន័យថា ផ្តល់អាវុធដល់អ៊ុយក្រែនឲ្យកាន់តែទំនើបជាងមុន។ ហើយនោះមានន័យថា គឺអ្វីគ្រប់យ៉ាងដែលអ៊ុយក្រែនត្រូវការ ដើម្បីរារាំងរុស្ស៊ី ដូចជាកិច្ចសហប្រតិបត្តិការស៊ើបការណ៍សម្ងាត់ អាវុធមានប្រសិទ្ធភាពជាងមុន និងគ្រឿងយុទ្ធោបរណ៍កាន់តែទំនើបជាងមុន»៕