ស្រ្តីទីបេតិ៍និរទេសខ្លួនប្រហែល ២ពាន់នាក់ នៅទីក្រុងភាគខាងជើង Dharamsala ប្រទេសឥណ្ឌា នាំគ្នាដង្ហែក្បួនតវ៉ាកាលពីថ្ងៃពុធ ដើម្បីរំឭកដល់តួនាទីរបស់ស្រ្តីនៅក្នុងការបះបោរទីបេតិ៍ឆ្នាំ ១៩៥៩ ។

ស្រ្តីនាំគ្នាកាន់បដា ពេលដែលពួកគេស្រែកពាក្យស្លោកឈ្មោះមាតុភូមិរបស់ពួកគេ គឺតំបន់ទីបេតិ៍ ។

ការដង្ហែក្បួននេះ ត្រូវបានរៀបចំឡើងដោយសមាគមស្រ្តីទីបេតិ៍(TWA) ដែលព្យាយាមស្វែងរកការពង្រឹងសមភាពស្រ្តីទីបេតិ៍ ទាំងនៅមាតុភូមិរបស់ពួកគេ និងនៅសហគមន៍និរទេស ។

អ្នកស្រី Tenzin Kunsel គឺជាប្រធានសមាគម TWA និយាយថា នៅឆ្នាំ ១៩៥៩ ពេលដែលតំបន់ទីបេតិ៍ទាំងមូលកាន់កាប់ដោយចិន ពួកយើងមានការបះបោរតែមួយ ចលនាតែមួយធ្វើឡើងដោយស្រ្តីទីបេតិ៍ នៅមុខវិមាន Potala ។ 

គួររំឭកថា ការបះបោរប្រឆាំងការគ្រប់គ្រងរបស់ចិននៅតំបន់ទីបេតិ៍ បានផ្ទុះឡើងនៅឆ្នាំ ១៩៥៨ ហើយទាហានចិន បានកម្ទេចពួកគេនៅឆ្នាំបន្ទាប់ ។

មេដឹកនាំសាសនាទីបេតិ៍សម្តេចសង្ឃ Dalai Lama បានរត់ភៀសខ្លួនចេញពីការបង្ក្រាបនោះ ហើយត្រូវបានផ្តល់សិទ្ធិជ្រកកោននៅក្នុងប្រទេសឥណ្ឌា ។

សម្តេចសង្ឃ Dalai Lama បានគង់ភាគច្រើននៅទីក្រុង Dharamsala ជាទីដែលក្រុមអ្នកគាំទ្ររបស់ព្រះអង្គគ្រប់គ្រងរដ្ឋាភិបាលនិរទេសតូចមួយ ហើយនិងគាំទ្រឲ្យមានតំបន់ស្វយ័តសម្រាប់តំបន់ទីបេតិ៍ តាមរយៈមធ្យោបាយសន្តិវិធី ៕