ប្រជាពលរដ្ឋអ៊ុយក្រែនរស់នៅក្នុងទីក្រុង Kryvyi Rih បាននិយាយថាកាលពីថ្ងៃពុធថា ពួកគេមិនគិតថា ទីក្រុងម៉ូស្គូមានឆន្ទៈចង់បានបទឈប់បាញ់នោះទេ ក្រោយរុស្ស៊ី បើកការវាយប្រហារមីស៊ីលលើទីក្រុងរបស់ពួកគេ ។

លោក Yurii គឺជាអ្នកស្រុកម្នាក់រស់នៅក្នុងប្លុកអគារផ្ទះល្វែងរកបានខូចខាត បាននិយាយប្រាប់ទីភ្នាក់ងារព័ត៌មានរ៉យទ័រថា កិច្ចប្រជុំស្វែងរកសន្តិភាពអាចទៅរួច ពេលដែលមិនមែនភាគីម្ខាង ប៉ុន្តែភាគីទាំង ២ មានឆន្ទៈចង់បញ្ចប់សង្រ្គាម ។ អកុសល ពួកយើងពុំបានមើលឃើញឆន្ទៈបែបនេះ ពីភាគីរុស្ស៊ីនោះឡើយ ។

អភិបាលតំបន់ Dnipropetrovsk លោក Serhiy Lysak និយាយនៅថ្ងៃពុធនេះថា ការវាយប្រហារមីស៊ីលរុស្ស៊ីលើទីក្រុងភាគកណ្តាល Kryvyi Rih របស់អ៊ុយក្រែន បានសម្លាប់ស្រ្តីវ័យ ៤៧ឆ្នាំម្នាក់ និងមនុស្សយ៉ាងហោច ៥នាក់ផ្សេងទៀត បានរងរបួស ។

 លោក Serhiy និយាយនៅក្នុងសេចក្តីថ្លែងការណ៍បង្ហោះលើបណ្តាញព័ត៌មានសង្គម Telegramថា ការវាយប្រហារនេះដែរ ត្រូវចំហេដ្ឋារចនាសម្ព័ន្ធ និងបណ្តាលឲ្យកើតមានអគ្គិភ័យ ។

 សេវាកម្មសង្រ្គោះបន្ទាន់ បានចែករំលែករូបថតសន្លឹកតាមអនឡាញ ឃើញសណ្ឋាគារមួយកន្លែងរងការបំផ្លិចបំផ្លាញយ៉ាងធ្ងន់ធ្ងរ ហើយបុរសរងរបួសម្នាក់ ទទួលបានការព្យាបាលនៅកន្លែងកើតហេតុ ។

ការវាយប្រហារនេះដែរ បានកើតមានឡើង ក្រោយប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃអង្គារថា ប្រទេសរបស់លោកបានទទួលយកបទឈប់បាញ់រយៈពេល ៣០ថ្ងៃដែលស្នើឡើងដោយសហរដ្ឋអាមេរិក បន្ទាប់ពីកិច្ចចរចាសន្តិភាពដ៏សំខាន់រវាងក្រមមន្ត្រីអាមេរិក និងអ៊ុយក្រែន នៅប្រទេសអារ៉ាប៊ីសាអ៊ូឌីត ។

 លោក Zelensky បាននិយាយបន្ទាប់ពីកិច្ចប្រជុំអស់រយៈពេលជាង ៨ម៉ោងថា សំណើបទឈប់បាញ់ដែលទទួលយកដោយអ៊ុយក្រែនគ្របដណ្តប់លើសមរភូមិជួរមុខទាំងស្រុងនៃការប្រយុទ្ធជាមួយរុស្ស៊ី មិនមែនត្រឹមតែផ្លូវអាកាស និងសមុទ្រប៉ុណ្ណោះទេ ។

 គួរឲ្យដឹងថា ទីក្រុង Kryvyi Rihដែលជាទីក្រុងកំណើតរបស់លោក Zelenskiy បានក្លាយជាគោលដៅវាយប្រហារញឹកញាប់ ចាប់តាំងពីរុស្ស៊ី បើកការវាយលុកពេញលេញរបស់ពួកគេលើអ៊ុយក្រែនកាលពីរយៈពេល ៣ឆ្នាំមុន ៕