​បាល់ទាត់៖ ​ក្លិប​បិសាច​ក្រហម Manchester United នឹង​ប្រកាស​អ្នកចាត់ការ​បណ្តោះអាសន្ន​របស់ខ្លួន​នៅ​ពេល​ឆាប់ៗ​នេះហើយ​គឺ​លោក Ralf Rangnick ដែល​នឹង​ចុះហត្ថលេខា​ដឹកនាំ​ក្លិប​នៅ Old Trafford ក្នុង​កិច្ចសន្យា ៦ខែ​។ ​​បុរស​វ័យ ៦៣ឆ្នាំ​រូបនេះ​បាន​ឈានដល់​កិច្ចព្រមព្រៀង​ជាមួយ Manchester United ហើយ​នៅឡើយ​តែ​សាមី​ក្លិប​របស់គាត់​គឺ​ក្លិប​រុស្ស៊ី Lokomotiv Moscow ដែល​បច្ចុប្បន្ន​លោក​គឺជា​ប្រធាន​ផ្នែក​អភិវឌ្ឍ​កីឡា​ប្រចាំ​ក្លិប​។​

​​រយៈពេល ៣រដូវ​កាល​គ្មាន​ឈ្នះ​ពាន​អ្វី​សោះ​ក្រោម​ការដឹកនាំ​របស់ Ole Gunnar Solskjaer បានបញ្ចប់​ត្រឹម​ចុង​សប្តាហ៍​មុន​ក្រោយ Manchester United ចាញ់ Watford ៤-១​។ ​​តើ​ហេតុអ្វី Manchester United សំរេច​ជ្រើស​រើសយក​លោក Ralf Rangnick អ្នកដឹកនាំ​បណ្តោះអាសន្ន​? លោក Ralf Rangnick ធ្លាប់​ដឹកនាំ​ក្លិប​អាល្លឺម៉ង់ Schalke 04 ឈ្នះ​ជើងឯក German Cup នៅ​ឆ្នាំ២០១១ និង​ធ្លាប់​ដឹកនាំ RB Leipzig ផងដែរ​។ ​​ជាពិសេស​ទៅទៀត​នៅ​ឆ្នាំ២០១១ នោះ​អ្នកចាត់ការ​សញ្ជាតិ​អាល្លឺម៉ង់​រូបនេះ​បាន​ដឹកនាំ Schalke ឡើងដល់​វគ្គ​ពាក់កណ្តាល​ផ្តាច់ព្រ័ត្រ UEFA Champions League តែ​ចាញ់ Manchester United សរុប​ទាំងពីរ​ជើង ៦-១ មុនពេល​ដែល Manchester United ឡើងទៅ​ចាញ់ Barcelona នៅ​វគ្គ​ផ្តាច់ព្រ័ត្រ​។​ ​​លោក Ralf Rangnick ធ្លាប់មាន​ប្រវត្តិ​ដឹកនាំ​ក្លិប​ជាច្រើន តែ​សុទ្ធតែជា​ក្លិប​អាល្លឺម៉ង់​មាន​ដូច​ជា Stuttgart, Hannover, Hoffenheim, Schalke04 និង RB Leipzig ជាដើម​៕

​អត្ថបទ​៖​នាង សុភា​វុ​ធ