កងទ័ពលីបង់ បាននិយាយថា នៅថ្ងៃព្រហស្បតិ៍នេះ ខ្លួនបានទទួលទាហានម្នាក់ ដែលអ៊ីស្រាអែលចាប់ខ្លួនកាលពីចុងសប្តាហ៍មុន បន្ទាប់ពីប្រទេសនេះ បានប្រគល់អ្នកជាប់ឃុំចំនួន ៤នាក់ផ្សេងទៀត នៅដើមសប្តាហ៍នេះ។

កងទ័ពបាននិយាយនៅលើបណ្តាញសង្គម Xថា៖«កងទ័ពតាមរយៈគណៈកម្មាធិការអន្តរជាតិនៃកាក បាទក្រហម នៅថ្ងៃព្រហស្បតិ៍នេះ បានទទួលទាហាន ដែលត្រូវបានចាប់ពង្រត់ដោយសត្រូវអ៊ីស្រាអែល» កាលពីថ្ងៃអាទិត្យ  ដោយបន្ថែមថា ទាហានរូបនោះ ត្រូវបានបញ្ជូនទៅមន្ទីរពេទ្យ ដើម្បីព្យាបាល។

កាលពីថ្ងៃអង្គារ ប្រទេសលីបង់ បានទទួលអ្នកជាប់ឃុំចំនួន ៤នាក់ ដែលត្រូវបានអ៊ីស្រាអែលចាប់ខ្លួន ក្នុងអំឡុងពេលសង្រ្គាមជាមួយក្រុមហេសបូឡា បន្ទាប់ពីអ៊ីស្រាអែល បានប្រកាសថា ខ្លួនបានដោះលែងពួកគេ។

ការិយាល័យប្រធានាធិបតី បាននិយាយនៅពេលនោះថា៖«ប្រទេសលីបង់ បានទទួលអ្នកទោសលីបង់ ៤ នាក់ ដែលត្រូវបានចាប់ខ្លួនដោយកងកម្លាំងអ៊ីស្រាអែល ក្នុងអំឡុងពេលសង្រ្គាមចុងក្រោយ» ដោយបន្ថែមថា អ្នកទោសទី៥ ក៏ត្រូវដោះលែងដែរ។

អ៊ីស្រាអែលបាននិយាយមុននេះថា ខ្លួនបានដោះលែងអ្នកជាប់ឃុំទាំង ៥នាក់ ជាកាយវិការសុច្ឆន្ទៈ ចំពោះប្រធានាធិបតីលីបង់ Joseph Aoun ដែលទើបតែងតាំងថ្មីៗនេះ។