នាយសេនាធិការរបស់លោកនាយករដ្ឋមន្ត្រីហុងគ្រី Viktor Orban នៅថ្ងៃព្រហស្បតិ៍ (ទី១៣ ខែមីនា) នេះ បានប្រាប់ឲ្យដឹងថា នាយករដ្ឋមន្ត្រីអ៊ីស្រាអែល លោក Benjamin Netanyahu នឹងទៅបំពេញទស្សនកិច្ចជាផ្លូវការ នៅប្រទេសហុងគ្រី ក្នុងប៉ុន្មានសប្តាហ៍ខាងមុខនេះ។

លោក Orban បានអញ្ជើញលោក Netanyahu ឲ្យបំពេញទស្សនកិច្ច នៅហុងគ្រី កាលពីខែវិច្ឆិកាឆ្នាំមុន ដោយលោកបានធានាថា នឹងមិនការអនុវត្តតាមនោះឡើយ ចំពោះដីកាចាប់ខ្លួនរបស់តុលាការឧក្រិដ្ឋកម្មអន្តរជាតិ (ICC) ដែលបានចេញមួយថ្ងៃមុននោះ ជុំវិញការចោទប្រកាន់ពីបទឧក្រិដ្ឋកម្មសង្គ្រាមរបស់អ៊ីស្រាអែល នៅតំបន់ហ្កាហ្សា។

លោក Gergely Gulyas បានប្រាប់សន្និសីទសារព័ត៌មានមួយថា៖ «យោងទៅតាមគម្រោងបច្ចុប្បន្ន ទស្សនកិច្ចនោះ នឹងកើតមាននៅមុនបុណ្យ Easter (បុណ្យរំលឹកដល់ការមានព្រះជន្មឡើងវិញរបស់ព្រះយេស៊ូ)។ នៅពេលដែលកាលបរិច្ឆេទត្រូវបានបញ្ជាក់ យើងនឹងប្រកាសឲ្យដឹង ដោយក្នុងករណីនេះ ត្រូវគិតគូរអំពីសុវត្ថិភាពសំខាន់បំផុត»។

ប្រជាជាតិអឺរ៉ុបមួយចំនួនផ្សេង បានលើកឡើងថា លោក Netanyahu នឹងត្រូវបានឃុំខ្លួន ប្រសិនបើលោកឈានជើងជាន់ដែនដីរបស់ពួកគេ។ រដ្ឋសមាជិកសហភាពអឺរ៉ុប (EU) ទាំងអស់ ក្នុងនោះរួមមានទាំងហុងគ្រីផងដែរ គឺជាសមាជិករបស់ ICC ដែលមានន័យថា ពួកគេតម្រូវឲ្យអនុវត្តតាមដីការបស់ស្ថាប័ននេះ។ លោក Orban ដែលជាអ្នកជាតិនិយមប្រកាន់ស្តាំ តែងតែមានជម្លោះជាមួយ EU ជុំវិញស្តង់ដារប្រជាធិបតេយ្យ និងសិទ្ធិមនុស្ស នៅហុងគ្រី។

ICC បានចេញដីកាចាប់ខ្លួន កាលពីថ្ងៃទី២១ ខែវិច្ឆិកា ឆ្នាំ២០២៤ សម្រាប់លោក Netanyahu និងអតីតប្រមុខការពារជាតិរបស់លោក ក៏ដូចជាមេដឹកនាំក្រុមហាម៉ាស លោក Ibrahim Al-Masri ពីបទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ ក្នុងជម្លោះ នៅតំបន់ហ្កាហ្សា៕