នៅថ្ងៃព្រហស្បតិ៍នេះ ចិននិយាយថា ខ្លួនគាំទ្រការប្រើប្រាស់មធ្យោបាយនយោបាយ និងការទូត ដើម្បីដោះស្រាយបញ្ហានុយក្លេអ៊ែរអ៊ីរ៉ង់ ដរាបណាវានៅតែមាន រយៈពេល ១ថ្ងៃប៉ុណ្ណោះ មុនពេលទីក្រុងប៉េកាំងត្រៀមខ្លួន ធ្វើជាម្ចាស់ផ្ទះកិច្ចប្រជុំត្រីភាគីជាមួយរុស្ស៊ី និងអ៊ីរ៉ង់ ។

អ្នកនាំពាក្យក្រសួងការបរទេសចិនអ្នកស្រី Mao Ning និយាយនៅក្នុងសន្និសីទសារព័ត៌មានថា ជំនួបនៅក្នុងទីក្រុងប៉េកាំង គឺជាកិច្ចខិតខំការទូតថ្មីបំផុតរបស់ចិន ក្នុងការពង្រឹងទំនាក់ទំនង និងការសម្របសម្រួល បង្កើតលក្ខខណ្ឌសម្រាប់ការចាប់ផ្តើមឡើងវិញកិច្ចចរចា និងកិច្ចពិភាក្សាលើបញ្ហានុយក្លេអ៊ែរ ។

គួរឲ្យដឹងថា ទំនាក់ទំនងរវាងរុស្ស៊ី និងអ៊ីរ៉ង់កាន់តែស៊ីជម្រៅខ្លាំង ចាប់តាំងពីការចាប់ផ្តើមសង្រ្គាមអ៊ុយក្រែនកាលពីឆ្នាំ ២០២២ ក្នុងនោះកិច្ចព្រមព្រៀងកិច្ចសហប្រតិបត្តិការយុទ្ធសាស្រ្ត ត្រូវបានចុះហត្ថលេខារវាងប្រទេសទាំង ២ កាលពីខែមករា ។ ពួកគេមានទំនាក់ទំនងល្អប្រសើរជាមួយចិនផងដែរ ។

ជំនួបនៅថ្ងៃសុក្រស្អែកនេះដែរ កើតមានឡើងបន្ទាប់ពីជំនួបបិទទ្វាររបស់ក្រុមប្រឹក្សាសន្តិសុខអង្គការសហប្រជាជាតិ(UN) នៅបុរីញូវយ៉ក សហរដ្ឋអាមេរិក ក្នុងសប្តាហ៍នេះ ក្រោយពីក្រុមឃ្លាំមើលនុយក្លេអ៊ែរ UN គឺទីភ្នាក់ងារថាមពលអាតូមិកអន្តរជាតិ(IAEA) ព្រមានថា អ៊ីរ៉ង់នឹងពង្រីកស្តុកអ៊ុយរ៉ានីញ៉ូមរបស់ពួកគេ ខិតជិតដល់កម្រិតផលិតអាវុធនុយក្លេអ៊ែរ ។ 

ទោះបីជាយ៉ាងណាក៏ដោយ អ៊ីរ៉ង់បានច្រានចោលការប៉ុនប៉ងផលិតអាវុធនុយក្លេអ៊ែរ ហើយពួកគេនិយាយថា កម្មវិធីនុយក្លេអ៊ែររបស់ខ្លួន ក្នុងបុព្វហេតុសន្តិភាពប៉ុណ្ណោះ ៕