ក្រសួងការពារជាតិរុស្ស៊ី និយាយនៅថ្ងៃព្រហស្បតិ៍នេះថា កងកម្លាំងរុស្ស៊ី ដណ្តើមបានមកវិញទីក្រុង Sudzha ពីទាហានអ៊ុយក្រែន ដែលជាទីក្រុងសំខាន់ស្ថិតនៅតំបន់ភាគលិច Kursk ប្រទេសរុស្ស៊ី ។

ក្រសួងបន្តថា ទាហានក្រុងម៉ូស្គូ ដណ្តើមបានមកវិញផងដែរភូមិ ២ផ្សេងទៀត គឺភូមិ Melovoi និងភូមិ Podol ។ ទោះបីជាយ៉ាងណាក៏ដោយ ទីភ្នាក់ងារព័ត៌មានរ៉យទ័រ ពុំអាចបញ្ជាក់ផ្ទៀងផ្ទាត់ដោយឯករាជ្យបានឡើយ ចំពោះសេចក្តីរាយការណ៍ទាំងនេះ ។

ការដណ្តើមបានមកវិញទីក្រុង Sudzha ដែលជាទឹកដីស្ថានីយ៍ប្រេងសម្រាប់ការនាំឧស្ម័នរុស្ស៊ីទៅកាន់អឺរ៉ុបនោះ គឺជាការដណ្តើមបានដ៏សំខាន់មួយសម្រាប់រុស្ស៊ី ស្របពេលដែលពួកគេធ្វើសង្រ្គាមរុញច្រានកងកម្លាំងអ៊ុយក្រែនចេញពីតំបន់ Kursk ។

កាលពីថ្ងៃពុធម្សិលមិញ ប្រធានាធិបតីរុស្ស៊ីលោក Vladimir Putin ស្លៀកពាក់ឯកសណ្ឋាយោធា បានបំពេញដំណើរទស្សនកិច្ចទៅកាន់តំបន់ Kursk ដើម្បីសួរសុខទុក្ខទាហានរុស្ស៊ីនៅទីនោះ ហើយលោក បានបញ្ជាឲ្យពួកគេបង្កើនការរុលទៅមុខដូចផ្លេកបន្ទោ និងដណ្តើមដែនដីសេសសលដែលគ្រប់គ្រងដោយអ៊ុយក្រែន ឲ្យបានឆាប់ៗតាមដែលអាចធ្វើទៅបាន ៕