ក្រសួងការបរទេសរុស្ស៊ី និយាយនៅថ្ងៃព្រហស្បតិ៍នេះថា សហភាពអឺរ៉ុប(EU) មានផែនការបង្កើនការចំណាយការពារជាតិ កាន់តែញុះញង់ឲ្យមានសង្រ្គាមកាន់តែខ្លាំងជាងមុន ដោយ ផ្អែកលើគំនិតរបស់ពួកគេថា ប្រទេសមហាអំណាចអឺរ៉ុប ត្រូវបានគំរាមកំហែងដោយរុស្ស៊ី ។

ក្នុងខែនេះ គណកម្មការអឺរ៉ុប ស្នើសុំឲ្យខ្ចីប្រាក់រហូតដល់ ១៥០ពាន់លានអឺរ៉ូជាការផ្តល់កម្ចីដល់រដ្ឋាភិបាលសហភាពអឺរ៉ុប ក្រោមផែនការបំពាក់អាវុធជាថ្មី បង្កឡើងដោយសារសង្រ្គាមរុស្ស៊ីនៅអ៊ុយក្រែន ហើយនិងសេចក្តីបារម្ភថា អឺរ៉ុបលែងប្រាកដទៀតហើយចំពោះការការពាររបស់សហរដ្ឋអាមេរិក ។

ប្រធានគណកម្មការអឺរ៉ុបលោកស្រី Ursula von der Leyen និយាយថា កញ្ចប់ថវិការស្នើសុំអាចប្រមូលបានប្រាក់រហូតដល់ ៨០០ពាន់លានអឺរ៉ូ សម្រាប់វិស័យការពារជាតិអឺរ៉ុប ។

ទោះបីជាយ៉ាងណាក៏ដោយ អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova និយាយថា ផែនការរបស់លោកស្រី von der Leyen បង្កឲ្យមានការញុះញង់ពីសង្រ្គាមនៅទ្វីបអឺរ៉ុប ។

អ្នកស្រី Zakahrova បានវាយបកចំពោះការលើកឡើងរបស់អឺរ៉ុបថា រុស្ស៊ី ក្រោយវាយលុកអ៊ុយក្រែនកាលពីឆ្នាំ ២០២២ ឥលូវបានគំរាមកំហែងដល់សន្តិសុខអឺរ៉ុប ។

អ្នកស្រីនិយាយថា អឺរ៉ុបកំពុងធ្វើឲ្យសាយភាយរឿងរ៉ាវមិនពិតពីការគំរាមកំហែងរបស់រុស្ស៊ី ។ នេះគឺជាចេតនាចង់ប្រឌិតរឿង ផ្អែកលើការមិនពេញចិត្តនឹងរុស្ស៊ីដែលត្រូវបានផ្សព្វផ្សាញដោយក្រុមមន្រ្តីទីក្រុងព្រុចសែលពុំគ្រប់គ្រាន់ ៕