អូស្ត្រាលី កំពុងប្រឹងប្រែងដាក់ពង្រាយមីស៊ីលរយៈចម្ងាយឆ្ងាយថ្មី ខណៈការមកដល់នាពេលថ្មីៗនេះនៃនាវាចម្បាំងចិនដ៏មានអានុភាពនៅឯឆ្នេរសមុទ្រអូស្ត្រាលី បានផ្តល់នូវការព្រមានយ៉ាងខ្លាំងអំពីសាច់ដុំកងនាវាចរដែលកំពុងកើនឡើងរបស់ទីក្រុងប៉េកាំង។

នៅក្នុងជំហានមួយដើម្បីបង្កើនកម្លាំងយោធា ទីក្រុងកង់បេរ៉ា គ្រោងនឹងបំពាក់អាវុធបន្ថែមដល់ទាហានអូស្ត្រាលី ជាមួយនឹងមីស៊ីលប្រឆាំងនាវា និងរ៉ាដាតម្រង់គោលដៅកម្រិតខ្ពស់ ដើម្បីការពារដែនសមុទ្រដ៏ធំល្វឹងល្វើយរបស់ខ្លួន នេះបើយោងតាមសេចក្តីប្រកាស ព្រមទាំងសុន្ទរកថាជាផ្លូវការថ្មីៗនេះ និងសេចក្តីថ្លែងការណ៍របស់ក្រសួង។

រដ្ឋាភិបាលនិយាយថា មីស៊ីលប្រឆាំងនាវាទំនើប ២ប្រភេទថ្មីសម្រាប់កងទ័ព ដែលបាញ់ចេញពីជើងទម្របាញ់បង្ហោះចល័ត កំពុងស្ថិតក្រោមការវាយតម្លៃជាមួយនឹងការសម្រេចចិត្តដែលរំពឹងទុកនៅចុងឆ្នាំនេះ។ មន្ត្រីរដ្ឋាភិបាលអូស្ត្រាលីនិយាយថា កំណែអនាគតនៃប្រភេទមីស៊ីលកំណត់គោលដៅវាយប្រហារ Lockheed Martin ត្រូវបានគេរំពឹងថានឹងមានរយៈចម្ងាយរហូតដល់ទៅ ១.០០០គីឡូម៉ែត្រ ហើយអាចត្រូវបានបាញ់ចេញពីជើងទម្រកាំភ្លើងធំចល័តខ្ពស់ HIMARS។

គួរឱ្យដឹងថា កងទ័ពជើងទឹកចិន បានធ្វើឱ្យសេវាសន្តិសុខអូស្ត្រាលីភ័យព្រួយ ជាមួយនឹងការដាក់ពង្រាយនាវាចម្បាំងដ៏មានឥទ្ធិពលបំផុត ៣គ្រឿង នៅជិតដែនទឹកទីក្រុងធំជាងគេរបស់អូស្រ្តាលី គឺទីក្រុងស៊ីដនី និងមែលប៊ន កាលពីចុងខែមុន៕