លោកប្រធានាធិបតី Vladimir Putin បាននិយាយកាលពីថ្ងៃព្រហស្បតិ៍សប្ដាហ៍នេះថា រុស្ស៊ី បានឡោមព័ទ្ធទាហានអ៊ុយក្រែនដែលនៅសេសសល់ក្នុងតំបន់Kurskភាគខាងលិចជាទីដែលពួកគេបានជាប់គាំងអស់រយៈពេលជាង៧ខែក្នុងសមរភូមិដ៏សំខាន់មួយនៃសង្រ្គាមជាង៣ឆ្នាំមកនេះ។

មួយថ្ងៃបន្ទាប់ពីណែនាំមេបញ្ជាការជាន់ខ្ពស់របស់លោកឱ្យបញ្ចប់ការបណ្តេញកងកម្លាំងអ៊ុយក្រែនឱ្យបានលឿនតាមដែលអាចធ្វើបាន លោកPutin បានប្រាប់សន្និសីទសារព័ត៌មានថាស្ថានភាពនៅតំបន់ Kursk គឺស្ថិតនៅក្រោមការគ្រប់គ្រងរបស់យើងទាំងស្រុង ហើយក្រុមដែលឈ្លានពានទឹកដីរបស់យើងគឺស្ថិតនៅក្នុងស្ថានភាពយ៉ាប់យ៉ឺន ។

មេបញ្ជាការកំពូលរបស់អ៊ុយក្រែន បានបដិសេធក្នុងសប្តាហ៍នេះដែលថាកងកម្លាំងរបស់លោកកំពុងត្រូវបានឡោមព័ទ្ធ ប៉ុន្តែបាននិយាយថា កងកម្លាំងរបស់ខ្លួនកំពុងស្ថិតនៅក្នុងទីតាំងមានសុវត្ថិភាព ជាងមុន។ប្រធានបុគ្គលិកយោធារបស់ខ្លួននិយាយកាលពីថ្ងៃព្រហស្បតិ៍សប្ដាហ៍នេះថា ការវាយប្រហាររបស់រុស្សីចំនួនប្រាំ ត្រូវបានបណ្ដេញឲ្យបកក្រោយ ហើយការប៉ះទង្គិចគ្នាកំពុងបន្តក្នុងទីតាំង ៤។

អ្នកឆ្លើយឆ្លងព័ត៌មានសង្គ្រាមរុស្ស៊ីម្នាក់បានរាយការណ៍ពីការបាញ់កាំភ្លើងធំរបស់អ៊ុយក្រែនយ៉ាងខ្លាំងក្លាទៅលើទីក្រុង Sudzha ដែលរុស្ស៊ីដណ្តើមបានមកវិញកាលពីថ្ងៃពុធ។ ផែនទីដែលបានចេញផ្សាយដោយបណ្ដាញព័ត៌មាន Deep State ជាប្រភពផ្លូវការរបស់អ៊ុយក្រែនដែលបានតាមដានស្ថានភាពសមរភូមិជួរមុខនៃសង្រ្គាម បានបង្ហាញពីការថយចុះយ៉ាងខ្លាំងនៃទឹកដីដែលកាន់កាប់ដោយអ៊ុយក្រែននៅក្នុងសប្តាហ៍មុន ប៉ុន្តែមានការប្រែប្រួលតិចតួចក្នុងរយៈពេល ២៤ ម៉ោងកន្លងនេះ។

លោក Putin បាននិយាយថាទាហានអ៊ុយក្រែនត្រូវបានកាត់ផ្តាច់នៅខាងក្នុងតំបន់ឈ្លានពាន។ ហើយប្រសិនបើមានការបិទផ្លូវដោយកងទ័ពណាមួយនឹងកើតឡើងនៅប៉ុន្មានថ្ងៃខាងមុខ នោះគ្មាននរណាម្នាក់ នឹងអាចចាកចេញបានឡើយ ហើយមានតែវិធីពីរយ៉ាងប៉ុណ្ណោះ គឺការទម្លាក់អាវុធចុះចាញ់ ឬស្លាប់៕