អង់គ្លេស៖ កាលពីថ្ងៃព្រហស្បតិ៍ចក្រភពអង់គ្លេសបាននិយាយថា ខ្លួនមានក្ដីបារម្ភខ្លាំងចំពោះវីរុសកូរ៉ូណាបម្លែងខ្លួនថ្មីទើបរកឃើញថ្មីទៀត ដែលកំពុងឆ្លងរាតត្បាតនៅអាហ្វ្រិកខាងត្បូង ដែលអាចធ្វើឲ្យប្រសិទ្ធភាពវ៉ាក់សាំងចុះខ្សោយ និងបង្អាក់ដល់ការវិវត្តន៍ទូទាំងពិភពក្នុងការប្រយុទ្ធប្រឆាំងនឹងវីរុសរាតត្បាតសកល។
ទីភ្នាក់ងារសន្តិសុខសុខភាពចក្រភពអង់គ្លេសបាននិយាយថា វីរុសបម្លែងខ្លួនថ្មីដែលគេហៅឈ្មោះថា B.1.1.529 មានប្រូតេអ៊ីនខ្ពស់ដែលខុសពីវីរុសកូរ៉ូណាដើម ដែលវ៉ាក់សាំងបង្ការវីរុស COVID-19 អាចទប់ស្កាត់ការចម្លងបាន។ ក្រុមមន្ត្រីបានហៅវីរុសបម្លែងខ្លួនថ្មីដែលមានការប្រែប្រួលលឿនទ្វេដង ដូចជាវីរុសបម្លែងខ្លួនថ្មី Delta បច្ចុប្បន្នថាជាវីរុសធ្ងន់ធ្ងរបំផុត។ លោកស្រី Jenny Harries ប្រធានទីភ្នាក់ងារសន្តិសុខសុខភាពចក្រភពអង់គ្លេសបាននិយាយថា នេះជាវីរុសបម្លែងខ្លួនមានឥទ្ធិពលបំផុត ដែលយើងបានប្រយុទ្ធប្រឆាំងរហូតមកដល់បច្ចុប្បន្ន ហើយការស្រាវជ្រាវបន្ទាន់កំពុងធ្វើឡើង ដើម្បីសិក្សាបន្ថែមទៀតឲ្យដឹងពីភាពងាយចម្លង ភាពធ្ងន់ធ្ងរ និងថាតើវ៉ាក់សាំងអាចទបស្កាត់ការចម្លងវីរុសនេះបានច្រើនប៉ុណ្ណា។
វីរុសបម្លែងខ្លួនថ្មីនេះត្រូវបានរកឃើញដំបូងនៅដើមសប្ដាហ៍នេះ ប៉ុន្តែចក្រភពអង់គ្លេសបានប្រញាប់ប្រញាល់ដាក់ចេញវិធានការរឹតត្បិត សម្រាប់ការធ្វើដំណើរទៅកាន់ប្រទេសអាហ្វ្រិកខាងត្បូង និងប្រទេសជិតខាងចំនួន ៥ទៀតជាចំណាត់ការឆ្លើយតបឆាប់រហ័ស ខ្លាំងជាងវិធានការទប់ស្កាត់វីរុសបម្លែងខ្លួនថ្មីដ៏មានឥទ្ធិពលបច្ចុប្បន្ន Delta៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
