ប្រធានាធិបតីអាមេរិក លោក Donald Trump បានលើកឡើងកាលពីថ្ងៃព្រហស្បតិ៍ (១៣ មីនា) ថា លោកនៅតែមានទំនាក់ទំនងល្អជាមួយមេដឹកនាំកូរ៉េខាងជើង លោក គីម ជុងអ៊ុន (Kim Jong Un) ដែលលោកបានជួបប្រជុំកំពូលជាច្រើនដងក្នុងអំឡុងពេលអាណត្តិដំបូងរបស់ខ្លួន ហើយមេដឹកនាំអាមេរិករូបនេះ បានហៅកូរ៉េខាងជើងម្តងទៀតថាជា "មហាអំណាចនុយក្លេអ៊ែរ"។

នៅពេលត្រូវសាកសួរដោយអ្នកសារព័ត៌មានក្នុងអំឡុងពេលកិច្ចប្រជុំជាមួយអគ្គលេខាធិការអង្គការណាតូ ថាតើលោកមានគម្រោងបង្កើតទំនាក់ទំនងឡើងវិញជាមួយលោក Kim ដែរឬទេ លោក Trump បានឆ្លើយថា "រូបលោកមានទំនាក់ទំនងដ៏អស្ចារ្យជាមួយលោក Kim Jong Un រួចទៅហើយ ប៉ុន្តែក៏នឹងរង់ចាំមើលអ្វីកើតឡើងបន្ទាប់" ដោយបន្ថែមថា "ប្រាកដណាស់កូរ៉េខាងជើងជាមហាអំណាចនុយក្លេអ៊ែរ"។

នៅថ្ងៃទី២០ ខែមករា ក្នុងពេលឡើងកាន់តំណែងអាណត្តិទីពីរ លោក Trump បាននិយាយថា កូរ៉េខាងជើងគឺជា "មហាអំណាចនុយក្លេអ៊ែរ" ដែលនេះបានបង្កជាសំណួរថា តើលោកនឹងជ្រើសរើសបន្តកិច្ចចរចាកាត់បន្ថយអាវុធ ជំនួសឱ្យកិច្ចខិតខំប្រឹងប្រែងលុបបំបាត់អាវុធនុយក្លេអ៊ែរកាលពីអាណត្តិដំបូងរបស់ខ្លួន ឬយ៉ាងណា។

កាលពីសប្តាហ៍មុន ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង គឺលោកស្រី Kim Yo Jong បានរិះគន់រដ្ឋបាលលោក Trump ថាបង្កើន "ការបង្កហេតុ" ហើយថា នេះជាហេតុផលសមស្របសម្រាប់កូរ៉េខាងជើង ក្នុងការបង្កើនការរារាំងនុយក្លេអ៊ែរ។ ក្នុងសប្តាហ៍នេះ កូរ៉េខាងជើងបានបាញ់មីស៊ីលបាលីស្ទិកជាច្រើនគ្រាប់ ដែលជាលើកដំបូងហើយចាប់តាំងពីលោក Trump ចូលកាន់តំណែង៕