ប្រទេសស៊ូដង់កាលពីថ្ងៃព្រហស្បតិ៍ បានផ្អាកការនាំចូលទាំងអស់ពីប្រទេសកេនយ៉ា ជុំវិញការធ្វើជាម្ចាស់ផ្ទះនៃសកម្មភាពចុងក្រោយ ដែលពាក់ព័ន្ធនឹងកងកម្លាំងយោធាប៉ារ៉ាគាំទ្ររហ័ស (RSF) កាលពីចុងខែកុម្ភៈ។

ក្រឹត្យដែលចេញដោយរដ្ឋមន្ត្រីស្តីទីក្រសួងពាណិជ្ជកម្ម និងផ្គត់ផ្គង់របស់ប្រទេសស៊ូដង់ លោក Omar Ahmed Mohamed Ali ដែលជាច្បាប់ចម្លងដែលទីភ្នាក់ងារសារព័ត៌មានស៊ីនហួទទួលបាន បានឲ្យដឹងថា៖«ការនាំចូលផលិតផលទាំងអស់ពីប្រទេសកេនយ៉ាតាមច្រក ច្រកឆ្លងកាត់ អាកាសយានដ្ឋាន និងច្រកចូលទាំងអស់ ត្រូវបានផ្អាក ចាប់ពីកាលបរិច្ឆេទនេះ (ថ្ងៃទី ១៣ ខែមីនា) រហូតដល់មានការជូនដំណឹងបន្ថែម»។

កាលពីថ្ងៃទី ២២ ខែកុម្ភៈ កងកម្លាំង RSF និងក្រុមនយោបាយនិងប្រដាប់អាវុធ ដែលជាសម្ព័ន្ធមិត្តរបស់ខ្លួន បានចុះហត្ថលេខាលើ «ធម្មនុញ្ញនយោបាយ» មួយ នៅទីក្រុងណៃរ៉ូប៊ី ដោយបង្ហាញពីចេតនាបង្កើត   «រដ្ឋាភិបាលស្រមោល» នៅក្នុងប្រទេសស៊ូដង់។

រយៈពេលពីរថ្ងៃក្រោយមក រដ្ឋាភិបាលស៊ូដង់ បានថ្កោលទោសប្រទេសកេនយ៉ា ចំពោះការគាំទ្រកងកម្លាំង RSF ដែលកំពុងប្រយុទ្ធជាមួយកងកម្លាំងប្រដាប់អាវុធស៊ូដង់ (SAF) ចាប់តាំងពីពាក់កណ្តាលខែមេសា ឆ្នាំ ២០២៣ ហើយបានហៅការធ្វើជាម្ចាស់ផ្ទះនៃពិធីចុះហត្ថលេខារបស់ប្រទេសកេនយ៉ាថា «ទង្វើអរិភាព និងការជ្រៀតជ្រែកយ៉ាងបើកចំហ ក្នុងកិច្ចការផ្ទៃក្នុងរបស់ស៊ូដង់» និងការរំលោភលើធម្មនុញ្ញ និងកិច្ចព្រមព្រៀងអន្តរជាតិទាំងអស់។

ក្រសួងការបរទេសកេនយ៉ា បានការពារការធ្វើជាម្ចាស់ផ្ទះនៃព្រឹត្តិការណ៍របស់កងកម្លាំង RSFនេះ ដោយនិយាយថា ការធ្វើបែបនេះ គឺ«ស្របតាមតួនាទីរបស់ប្រទេសកេនយ៉ា ក្នុងការចរចាសន្តិភាព ដែលតម្រូវ  ឲ្យខ្លួនផ្តល់វេទិកាមិនលម្អៀងសម្រាប់ភាគីជម្លោះ ដើម្បីស្វែងរកដំណោះស្រាយ»។