អតីតប្រធានាធិបតីហ្វីលីពីន លោក Rodrigo Duterte ត្រូវបានចាប់ខ្លួននៅទីក្រុងម៉ានីល នៅសប្ដាហ៍នេះ ក្រោមសំណើរបស់តុលាការព្រហ្មទណ្ឌអន្តរជាតិ ICC ជុំវិញឧក្រិដ្ឋកម្មប្រឆាំងមនុស្សជាតិនៅក្នុងសង្រ្គាមប្រឆាំងគ្រឿងញៀនដ៏បង្ហូរឈាមរបស់លោក ហើយពេលនេះលោកកំពុងប្រឈមដំណើរការក្ដីក្ដាំផ្លូវច្បាប់ដ៏លំបាក។ 

នៅក្នុងសារទៅកាន់អ្នកគាំទ្រ លោក Duterte បាននិយាយថា "នេះនឹងជាដំណើរការផ្លូវច្បាប់ដ៏យូរ និងមិនងាយស្រួលនោះទេ ប៉ុន្តែលោកនឹងបន្តទទួលយកជោគវាសនារបស់ខ្លួន"។ បន្ទាប់ពីទៅដល់ទីក្រុងឡាអេ លោក Duterte ត្រូវបាន ICC ឃុំខ្លួន ហើយចូលសវនាការនៅតុលាការជាលើកដំបូងក្នុងថ្ងៃសុក្រសប្ដាហ៍នេះ ខណៈត្រៀមខ្លួនសម្រាប់ការប្រយុទ្ធទប់ទល់នឹងសង្រ្គាមផ្លូវច្បាប់ដ៏ស្មុគស្មាញនៅតុលាការព្រហ្មទណ្ឌអន្តរជាតិ។

រដ្ឋអាជ្ញានៅ ICC បានចោទប្រកាន់អតីតមេដឹកនាំហ្វីលីពីនវ័យ ៧៩ឆ្នាំរូបនេះពីបទបង្កើត និងបំពាក់អាវុធដល់នគរបាល ដែលទទួលខុសត្រូវចំពោះការសម្លាប់អ្នកប្រើប្រាស់ និងអ្នកជួញដូរគ្រឿងញៀនរាប់ពាន់នាក់អំឡុងពេលអាណត្តិរបស់លោក។ លោក Duterte បាននិយាយរួចហើយថា លោកនឹងទទួលខុសត្រូវទាំងស្រុងគ្រប់បែបយ៉ាងចំពោះ "សង្គ្រាមប្រឆាំងគ្រឿងញៀន" នេះ។

លោក Duterte នឹងក្លាយជាអតីតប្រមុខរដ្ឋអាស៊ីដំបូងគេដែលបង្ហាញខ្លួននៅចំពោះមុខតុលាការ ICC។ គួរឱ្យដឹងថា ក្នុងអំឡុងពេលកាន់តំណែងរយៈពេល ៦ឆ្នាំរបស់លោក ជនសង្ស័យចំនួន ៦.២០០នាក់ត្រូវបានសម្លាប់ក្នុងអំឡុងពេលប្រតិបត្តិការប្រឆាំងនឹងគ្រឿងញៀន នេះបើតាមតួលេខនគរបាល ប៉ុន្តែសកម្មជននិយាយថា ចំនួនអ្នកស្លាប់ពិតប្រាកដមានច្រើនជាងនេះ៕