ក្រុមអ្នកវិទ្យាសាស្រ្តអន្តរជាតិ សង្ឃឺមថា មូសឆ្លងហ្សែន(GM)របស់ពួកគេ នឹងអាចបញ្ឈប់ការរីករាលដាលឆ្លងជំងឺគ្រុនចាញ់ ដែលជាជំងឺបណ្តាលឲ្យស្លាប់មនុស្សច្រើនបំផុតនៅលើពិភពលោក ។

ក្រុមចម្លងកម្រិតសូន្យ(Transmission Zero) បានប្រើប្រាស់បច្ចេកវិទ្យាជំរុញហ្សែន ដើម្បីបង្កើតមូសធន់នឹងជំងឺគ្រុនចាញ់ ដែលនឹងបញ្ជូនភាពធន់របស់វាដល់មូសជំនាន់អនាគត ។

លោកសាស្រ្តាចារ្យ George Christophides ដែលដឹកនាំការស្រាវជ្រាវនៅមហាវិទ្យាល័យចក្រពត្តិក្រុងឡុងដ្រ៍ និយាយប្រាប់ទីភ្នាក់ងារព័ត៌មានរ៉យទ័រថា កម្មវិធីនេះត្រូវបានបង្កើតឡើងដើម្បីកំណត់ហ្សែនមូស ធ្វើឲ្យពួកវាមិនអាចចម្លងជំងឺគ្រុនចាញ់បាន ។

លោកបន្តថា នោះហើយបានជាពួកយើងដាក់ឈ្មោះក្រុមពួកយើងថា ជាក្រុមចម្លងកម្រិតសូន្យ ហើយបន្ទាប់មកនាំពួកវាឲ្យកាត់បន្ថយជំងឺគ្រុនចេញនៅក្នុងចំណោមសត្វព្រៃផងដែរ ។

ជំងឺគ្រុនចាញ់ សម្លាប់មនុស្សប្រហែល ៦០ម៉ឺននាក់ ជារៀងរាល់ឆ្នាំ ។ ក្នុងចំណោមអ្នកស្លាប់ទាំងនេះ ៩០ភាគរយ គឺជាកុមារក្រោមអាយុ ៥ឆ្នាំ ហើយចំនួន ៩០ភាគរយ គឺជាមនុស្សរស់នៅក្នុងទ្វីបអាហ្វ្រិក ។

ក្រុមអ្នកស្រាវជ្រាវ និយាយថា ការប្រយុទ្ធប្រឆាំងនឹងជំងឺមួយនេះ បានជាប់គាំងដោយសារបរាជ័យវិធានការប្រយុទ្ធប្រឆាំងបែបប្រពៃណី ភាពធន់កើនឡើងរបស់សត្វមូស ប៉ារ៉ាស៊ីតជំងឺគ្រុនចាញ់ក្នុងវិធីព្យាបាល និងវិធីគ្រប់គ្រងជំងឺមានស្រាប់ ៕