វាបានចាប់ផ្តើមជាមួយនឹងគោលនយោបាយដំឡើងពន្ធរបស់សហរដ្ឋអាមេរិក ប៉ុន្តែសង្រ្គាមពាណិជ្ជកម្ម កំពុងរាលដាលយ៉ាងលឿនរហ័ស ហួសពីការត្រឹមតែកាតព្វកិច្ចបង់ពន្ធនាំចូល ទៅជាសមរភូមិសងសឹកគ្នាកាន់តែទូលំទូលាយឡើងៗ។ កម្រិតពន្ធ ២៥ភាគរយរបស់ប្រធានាធិបតី Donald Trump លើប្រទេសកាណាដា បានធ្វើឲ្យថ្នាក់ដឹកនាំនៅទីនោះអាក់អន់ចិត្ត រហូតដល់ខេត្ត Ontario បានយកស្រាអាមេរិកចេញពីធ្នើរក្នុងហាងនានា។

អិភិបាលខេត្ត Ontario លោក Doug Ford ថែមទាំងបានគំរាមដំឡើងថ្លៃ ឬអាចបញ្ឈប់ទាំងស្រុង សម្រាប់ថាមពលអគ្គិសនីដែលបញ្ជូនទៅកាន់រដ្ឋចំនួន ៣ របស់សហរដ្ឋអាមេរិក ដោយបង្កើននូវហានិភ័យនៃការចំណាយលើថ្លៃអគ្គិសនីខ្ពស់ ឬអាចលែងមានចរន្តអគ្គិសនីប្រើប្រាស់តែម្ដង។ ការធ្វើបែបនោះបានធ្វើឲ្យលោក Trump ខឹងសម្បាយ៉ាងខ្លាំងដែលលោកបានប្តេជ្ញាយ៉ាងខ្លីថា នឹងយកពន្ធលើការនាំចូលដែកថែប និងអាលុយមីញ៉ូមរបស់សហរដ្ឋអាមេរិកទាំងអស់ ៥០ភាគរយ មុនបង្ហាញការត្រជាក់ចិត្តបន្តិចក្រោយមក។ 

ប៉ុន្តែកាលថ្ងៃព្រហស្បតិ៍ (ទី១៣ ខែមីនា) លោក Trump បានប្រាប់អ្នកសារព័ត៌មានថា៖ «ខ្ញុំនឹងផ្លាស់ប្ដូរគោលជំហរអ្វីទាំងអស់ ជុំវិញពន្ធអាលុយមីញ៉ូម ដែក និងរថយន្តរបស់កាណាដា»។ ការថ្លែងរបស់លោកនេះ បានធ្វើឡើងតែប៉ុន្មានម៉ោងប៉ុណ្ណោះមុនកិច្ចប្រជុំ រវាងមន្ត្រីអាមេរិក និងកាណាដា ស្តីពីពាណិជ្ជកម្ម។

ទន្ទឹមនឹងនេះ នៅក្នុងសេចក្តីថ្លែងការណ៍មួយ កាលពីថ្ងៃព្រហស្បតិ៍ អង្គការពាណិជ្ជកម្មពិភពលោក (WTO) បានឲ្យដឹងថា ប្រទេសកាណាដាបានស្នើសុំពិគ្រោះយោបល់ជាមួយ WTO ជុំវិញពន្ធរបស់សហរដ្ឋអាមេរិកលើដែកថែប និងអាលុយមីញ៉ូម។ កាណាដាអះអាងថា ពន្ធនេះបំពានច្បាប់ពាណិជ្ជកម្ម។ អ្នកជំនាញជាន់ខ្ពស់ នៅវិទ្យាស្ថាន Peterson សម្រាប់សេដ្ឋកិច្ចអន្តរជាតិ លោកស្រី Mary Lovely បាននិយាយយ៉ាងខ្លីថា៖ «ហ្គេមនេះបានរាលដាលចូលទៅតំបន់ផ្សេងទៀតហើយ»។ 

នេះមិនមែនគ្រាន់តែជាសង្គ្រាមពាណិជ្ជកម្ម រវាងសហរដ្ឋអាមេរិក និងកាណាដាប៉ុណ្ណោះទេ។ ប្រទេសចិនបានឆ្លើយតបទៅនឹងការដំឡើងពន្ធ ១០ភាគរយដំបូងរបស់លោក Trump នៅក្នុងខែកុម្ភៈ ដោយប្រកាសពន្ធសងសឹក ក៏ដូចជាការត្រួតពិនិត្យការនាំចេញថ្មី និងដោយបានបន្ថែមម្ចាស់ក្រុមហ៊ុន Calvin Klein PVH Group ទៅក្នុងបញ្ជីខ្មៅរបស់រដ្ឋាភិបាល។ 

ចំណែកសហភាពអឺរ៉ុប កាលពីថ្ងៃពុធ (ទី១២ ខែមីនា) បានតបតការដំឡើងពន្ធដែកថែប និងអាលុយមីញ៉ូមរបស់លោក Trump ដោយផ្តោតលើខោខូវប៊យ ទូក និងស្រាវីស្គីរបស់អាមេរិក ដែលធ្វើឲ្យឧស្សាហកម្មស្រារបស់អាមេរិកមានការខកចិត្តយ៉ាងខ្លាំង៕