ប្រធានាធិបតី Trump កាលពីថ្ងៃព្រហស្បតិ៍ (ទី១៣ ខែមីនា) បានហៅសហភាពអឺរ៉ុប (EU) ថា «អាក្រក់» ខណៈពេលដែលកំពុងអង្គុយក្បែរអគ្គលេខាធិការអង្គការណាតូ (NATO) លោក Mark Rutte។

លោក Trump បានត្អូញត្អែរ អំពីការយកពន្ធខ្ពស់លើរថយន្តផលិតដោយសហរដ្ឋអាមេរិក នៅអឺរ៉ុប និងសេចក្តីសម្រេចរបស់តុលាការយុត្តិធម៌របសសហភាពអឺរ៉ុប (EU) កាលពីខែកញ្ញា ដែលតម្រូវឲ្យក្រុមហ៊ុនបច្ចេកវិទ្យាយក្ស Apple និង Google បង់ប្រាក់ពិន័យរាប់ពាន់លានលើបញ្ហារំលោភលោភលើទំនុកចិត្ត។

នៅឯការិយាល័យ Oval Office លោក Trump បាននិយាយថា៖ «យើងមិនបានលក់រថយន្តទៅអឺរ៉ុបឡើយ។ ខ្ញុំមានន័យថា ស្ទើរតែគ្មានរថយន្តរបស់យើង តែពួកគេលក់រថយន្តរាប់លានគ្រឿងឲ្យយើងវិញ។ ពួកគេមិនយកផលិតផលកសិកម្មរបស់យើងទេ។ តែយើងយកផលិតផលកសិកម្មរបស់ពួកគេ ដោយនេះវាដូចជាផ្លូវមួយធ្វើដំណើរឯកទិស។ សហភាពអឺរ៉ុបអាក្រក់មែនទែន»។ 

លោកប្រធានាធិបតីបានបន្ថែមថា៖ «ពួកគេប្តឹងក្រុមហ៊ុនរបស់យើង។ ក្រុមហ៊ុន Apple ត្រូវបានបង្ខំឲ្យបង់ប្រាក់ចំនួន ១៦ពាន់លានដុល្លារលើករណី ដែលដូចករណីដែលខ្ញុំបានឈ្នះ។ ពួកគេមិនគួរជួបប្រទះករណីបែបនេះឡើយ ប៉ុន្តែយើងមានអារម្មណ៍ថា ពួកគេត្រូវជួបករណី ហើយពួកគេបានបញ្ចប់ដោយការសម្រេច និងចៅក្រុមមិនមានយុត្តធម៌។ ពួកគេប្តឹងក្រុមហ៊ុន Google ពួកគេប្តឹងក្រុមហ៊ុន Facebook ពួកគេប្តឹងក្រុមហ៊ុនទាំងអស់នេះ ហើយពួកគេយកប្រាក់រាប់ពាន់លានដុល្លារពីក្រុមហ៊ុនអាមេរិក»។

លោក Trump បានរិះគន់ EU កាលពីព្រឹកថ្ងៃព្រហស្បតិ៍ នៅពេលដែលលោកបានគំរាមដាក់ពន្ធ ២០០ភាគរយលើស្រា ស្រាសំប៉ាញ និងស្រាផ្សេងទៀតដែលនាំចូលពីអឺរ៉ុប ប្រសិនបើពួកគេមិនដកពន្ធលើស្រាវីស្គីទេនោះ។ សង្គ្រាមពាណិជ្ជកម្មជាមួយអឺរ៉ុប ត្រូវបានកើនឡើងកាលពីថ្ងៃពុធ នៅពេលដែលពន្ធ ២៥ភាគរយរបស់លោក Trump លើដែកថែប និងអាលុយមីញ៉ូម បានចូលជាធរមាន ដែលនាំឲ្យ EU សងសឹកយ៉ាងឆាប់រហ័សជាមួយនឹងវិធីសាស្រ្ត ២ជំហាន៕