មន្ត្រីអាមេរិក ២រូប បានប្រាប់សារព័ត៌មាន Reuters កាលពីថ្ងៃទី ១៣ ខែមីនាថា យោធាអាមេរិក ត្រូវតែធ្វើការ ដើម្បីផ្តល់ជម្រើស ក្នុងការធានាថា សហរដ្ឋអាមេរិកមានសិទ្ធិពេញលេញចូលទៅកាន់ព្រែកជីកប៉ាណាម៉ា។

លោកប្រធានាធិបតី Donald Trump បាននិយាយម្តងហើយម្តងទៀតថា លោកចង់ «យកមកវិញ» នូវព្រែកជីកប៉ាណាម៉ា ដែលមានទីតាំងនៅផ្នែកតូចចង្អៀតបំផុតនៃសមុទ្រ រវាងអាមេរិកខាងជើង និងខាងត្បូង ហើយត្រូវបានចាត់ទុកថា ជាផ្លូវទឹកដ៏សំខាន់បំផុតមួយរបស់ពិភពលោក ប៉ុន្តែលោកមិនបានផ្តល់ភាពជាក់លាក់អំពីរបៀបដែលលោកនឹងធ្វើ ឬថា តើសកម្មភាពយោធា អាចតម្រូវឲ្យមានដែរទេ។

មន្ត្រីអាមេរិកម្នាក់ ដែលបាននិយាយក្នុងលក្ខខណ្ឌមិនបញ្ចេញឈ្មោះ បានលើកឡើងថា ឯកសារមួយដែលត្រូវបានពិពណ៌នាថា ជាការណែនាំសន្តិសុខជាតិបណ្តោះអាសន្នដោយរដ្ឋបាលថ្មីនេះ បានអំពាវនាវឲ្យកងទ័ពពិនិត្យមើលជម្រើសយោធា ដើម្បីធានាសិទ្ធិចូលទៅកាន់ព្រែកជីកប៉ាណាម៉ានេះ។

មន្ត្រីទី២ បាននិយាយថា យោធាអាមេរិកមានជម្រើសដែលអាចមាន ដើម្បីធានាសិទ្ធិចូលទៅកាន់ព្រែកជីកនេះ ក្នុងនោះរួមទាំងការធានានូវភាពជាដៃគូជិតស្និទ្ធជាមួយយោធារបស់ប៉ាណាម៉ាថែមទៀតផង។

មន្ទីរបញ្ចកោណ បានចេញផ្សាយចុងក្រោយនូវយុទ្ធសាស្ត្រការពារជាតិ (NDS) នៅឆ្នាំ២០២២ ដែលជាឯកសារដែលដាក់ចេញនូវអាទិភាព សម្រាប់ការមានកម្លាំងយោធា។ ឯកសារបណ្ដោះអាសន្នមួយ បានកំណត់ពីការណែនាំអំពីគោលនយោបាយទូលំទូលាយ ដូចជាក្រឹត្យរបស់លោក Trump និងការអត្ថាធិប្បាយជាសាធារណៈដែលបានធ្វើឡើង មុនមានឯកសារគោលនយោបាយដែលត្រូវបានពិចារណាបន្ថែមទៀត ដូចជាយុទ្ធសាស្ត្រការពារជាតិផ្លូវការ។

មន្ទីរបញ្ចកោណមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕