ជម្លោះរវាងប្រទេសអង់គ្លេស និងរុស្ស៊ី ចាប់ផ្ដើមឡើងកម្ដៅបន្តិចម្ដងៗ ដោយចាប់ផ្ដើមពីអ្នកការទូតអង់គ្លេស ២រូប ត្រូវបានបណ្ដេញចេញ ក្នុងជម្លោះចារកម្ម ខណៈបន្ទាប់មក មានសេចក្តីថ្លែងការណ៍ធ្ងន់ៗពីទីភ្នាក់ងារចារកម្មបរទេសរបស់រុស្ស៊ី ដែលហៅអង់គ្លេសថា «អ្នកបង្កសង្គ្រាម»។ ហើយមានការគំរាមកំហែងពីសម្ព័ន្ធមិត្តធំជាងគេរបស់លោក Vladimir Putin ដែលចង់រឹបអូសទ្រព្យសម្បត្តិរបស់ចក្រភពអង់គ្លេស នៅប្រទេសរុស្ស៊ី។

ខណៈដែលសហរដ្ឋអាមេរិក ក្រោមការដឹកនាំរបស់លោក Donald Trump ប្រឹងប្រែងធ្វើឲ្យប្រសើរឡើងវិញនូវទំនាក់ទំនងជាមួយទីក្រុងមូស្គូ និងធ្វើជាអ្នកសម្របសម្រួលសន្តិភាព រវាងរុស្ស៊ី និងអ៊ុយក្រែន ចក្រភពអង់គ្លេស ត្រូវបានផ្ដល់ឋានៈជាគូរិធំជាងគេបំផុតរបស់រុស្ស៊ី។ វាគឺជាស្ថានភាពដែលបានកើតឡើងក្នុងរយៈពេលផ្សេងៗគ្នាជាច្រើនដង នៅ ២សតវត្សរ៍កន្លងមកនេះ។

នៅក្នុងសេចក្តីថ្លែងការណ៍ជាសាធារណៈមួយដែលបានធ្វើការចោទប្រកាន់មិនធម្មតា កាលពីថ្ងៃចន្ទ (ទី១០ ខែមីនា) ទីភ្នាក់ងារចារកម្មបរទេសរបស់រុស្ស៊ី បានលើកឡើងថា៖ «សព្វថ្ងៃនេះ ទីក្រុងឡុងដ៍កំពុងដើរតួជា «អ្នកបង្កសង្គ្រាម» របស់ពិភពលោកដ៏ធំ ពោលគឺមិនខុសពីកាលមុនសង្គ្រាមលោកទាំង ២លើកនៃសតវត្សរ៍ចុងក្រោយនេះទេ»។

ស្ថាប័ននេះបានចោទប្រកាន់ទីក្រុងឡុងដ្រ៍ថា បានព្យាយាមបង្អាក់កិច្ចប្រឹងប្រែងរបស់លោក Trump ក្នុងការស្វែងរកសន្តិភាព នៅអ៊ុយក្រែន។ ទីភ្នាក់ងារដែលត្រូវបានគេស្គាល់ថា ជា SVR បានបន្ថែមថា «ពេលវេលាបានមកដល់ហើយ ដើម្បីលាតត្រដាងពីពួកគេ និងផ្ញើសារច្បាស់លាស់ទៅកាន់ក្រុមលាក់ពុត និងពួកឥស្សរជនរបស់ក្រុមនេះថា អ្នកនឹងមិនជោគជ័យទេ»។ យ៉ាងណាក្ដី ស្ថាប័ននេះមិនបានបញ្ជាក់លម្អិត អំពីអ្វីដែលខ្លួនជឿថា ចក្រភពអង់គ្លេសជាអ្នកបង្កសង្គ្រាម នៅមុនសង្គ្រាមលោកទាំង ២លើកនោះឡើយ។

ការលុកលុយរបស់រុស្ស៊ីលើអ៊ុយក្រែន ក្នុងឆ្នាំ២០២២ បានក្លាយជាជម្លោះដ៏ធំ និងបង្ហូរឈាមបំផុតរបស់អឺរ៉ុប គិតចាប់តាំងពីសង្គ្រាមលោកលើកទី២។ ភ្លើងសង្គ្រាមនេះបានបណ្ដាលឲ្យមនុស្សរាប់សែននាក់ ស្លាប់ និងរបួស ខណៈរាប់លាននាក់ត្រូវភៀសខ្លួន និងបានបង្កឲ្យមានការប្រឈមមុខដាក់គ្នាខ្លាំងបំផុត រវាងទីក្រុងមូស្គូ និងលោកខាងលិចមិនធ្លាប់មាន ក្នុងរយៈពេលជាច្រើនទសវត្សរ៍មកនេះ៕