នៅថ្ងៃសុក្រនេះ តុលាការវៀតណាម បានសម្រេចកាត់ទោសដាក់ពន្ធនាគារមនុស្ស ៨នាក់ ជុំវិញហេតុការណ៍អគ្គិភ័យឆាបឆេះប្លុកអគារផ្ទះល្វែងកាលពីឆ្នាំ ២០២៣ ដោយបានសម្លាប់មនុស្ស ៥៦នាក់ ដែលជាគ្រោះមហន្តរាយអគ្គិភ័យស្លាប់មនុស្សច្រើនបំផុតក្នុងរយៈពេល ២ទសវត្សរ៍នៅវៀតណាម ។

អគារផ្ទះល្វែងនេះ មានច្រកចេញតែមួយគត់ ហើយគ្មានជណ្តើរសង្រ្គោះបន្ទាន់នៅខាងក្រៅនោះទេ ហើយអ្នកជិតខាង និងអ្នកស្រុក រាយការណ៍ថា ពួកគេបានឮសំឡេងស្រែកហៅឲ្យជួយ ពេលដែលមនុស្សព្យាយាមគេចចេញពីអណ្តាតភ្លើងតាមបង្អួច ។

សាលក្រមតុលាការ បានសម្រេចថា ម្ចាស់ប្លុកអគារផ្ទះល្វែង សមដាក់ទោសធ្ងន់ធ្ងរបំផុតសម្រាប់អគ្គិភ័យកាលពីខែកញ្ញា ឆ្នាំ ២០២៣ ដោយតុលាការកាត់ទោសគាត់ជាប់ពន្ធនាគាររយៈពេល ១២ឆ្នាំ ពីបទបំពានបទប្បញ្ញត្តិបង្ការអគ្គីភ័យ ។

ទោះបីជាយ៉ាងណាក៏ដោយ សាច់ញាតិជនរងគ្រោះ និយាយថា ការកាត់ទោសឲ្យជាប់ពន្ធនាគារនេះ គួរតែមានរយៈពេលយូរជាងនេះ ។

គ្រួសារជនរងគ្រោះ ត្រូវបានហាមឃាត់ពីការនិយាយជាមួយសារព័ត៌មាននៅក្រៅអគារតុលាការ ។ ស្រ្តីស្រែកយំម្នាក់ដែលនិយាយថា ការកាត់ទោសនេះមិនយុត្តិធម៌ ត្រូវបានគេរុញចេញឆ្ងាញ ។

អ្នកស្រី Le Van ដែលប្អូនប្រុស ប្អូនស្រីថ្លៃ និងកូនៗរបស់ពួកគេ ត្រូវបានសម្លាប់នៅក្នុងអគ្គិភ័យនោះ និយាយថា គាត់មិនពេញចិត្តនឹងសាលក្រមសម្រេចរបស់តុលាការនោះទេ ។ អ្នកស្រីថា ពួកគេគួរតែត្រូវបានផ្តន្ទាទោសខ្លាំងជាងនេះ សម្រាប់អ្វីដែលពួកគេបានធ្វើមកលើពួកយើង ៕