យោធាថៃ និយាយថា ក្រុមទាហានមីយ៉ាន់ម៉ា បានរត់ភៀសខ្លួនឆ្លងកាត់ព្រំដែនថៃនៅថ្ងៃសុក្រនេះ ក្រោយរងការវាយប្រហារពីក្រុមប្រដាប់អាវុធជនជាតិភាគតិច ដែលបានបណ្តេញពួកគេចេញពីមូលដ្ឋានឈរជើងរបស់ពួកគេ ។

មីយ៉ាន់ម៉ា បានញាំញីដោយសារសង្រ្គាមស៊ីវិល ក្រោយយោធារឹបអូសអំណាចនៅក្នុងរដ្ឋប្រហារកាលពីឆ្នាំ ២០២១ ក្នុងនោះរបបសឹក បាននឹងកំពុងធ្វើសង្រ្គាមជាមួយអង្គការជនជាតិភាគតិចប្រដាប់អាវុធ និងបក្ខពួកគាំទ្រលទ្ធិប្រជាធិបតេយ្យ ។

យោធាថៃ និយាយថា ក្រុមប្រដាប់អាវុធមកពីកងទ័ពរំដោះជាតិការ៉ែន(KNLA) បានវាយប្រហារមូលដ្ឋានយោធាខ្សែត្រៀមមុខ Pulu Tu នៅព្រឹកថ្ងៃសុក្រនេះ ។

ពួកគេបាននិយាយនៅក្នុងសេចក្តីថ្លែងការណ៍ថា យោធាមីយ៉ាន់ម៉ា បានការពារមូលដ្ឋានទ័ព ប៉ុន្តែចុងក្រោយ កងទ័ព KNLA ដណ្តើមបានការគ្រប់គ្រងដោយជោគជ័យ ។ ទាហានមីយ៉ាន់ម៉ាជាច្រើននាក់ ត្រូវបានសម្លាប់ ហើយទាហានខ្លះទៀត បានរត់ភៀសខ្លួនឆ្លងកាត់ព្រំដែនចូលទៅក្នុងទឹកដីថៃ ។

ទោះបីជាយ៉ាងណាក៏ដោយ សេចក្តីថ្លែងការណ៍នេះ ពុំបានបញ្ជាក់ពីចំនួនទាហានមីយ៉ាន់ម៉ាដែលត្រូវបានសម្លាប់នោះទេ ឬចំនួនទាហានមីយ៉ាន់ម៉ាដែលបានរត់ភៀសខ្លួនឆ្លងកាត់ព្រំដែនចូលទៅក្នុងខេត្ត Tak របស់ថៃ ប៉ុន្តែពួកគេនិយាយថា ពួកគេបានផ្តល់ជំនួយមនុស្សធម៌ដល់ទាហានមីយ៉ាន់ម៉ាទាំងអស់នេះ ៕