ក្រុមកម្មករដែលត្រូវបានធ្វើបទសម្ភាស៍ដោយទីភ្នាក់ងារព័ត៌មានរ៉យទ័រ និយាយថា ភាពពុំច្បាស់លាស់ដែលប្រឈមមុខនឹងសេដ្ឋកិច្ចរបស់ទីក្រុងព្រំដែន Ciudad Juarez ជាមួយនឹងជម្លោះពន្ធរវាងម៉ិកស៊ិក និងសហរដ្ឋអាមេរិក បណ្តាលឲ្យមានកង្វះខាតការងារធ្វើនៅក្នុងឧស្សាហកម្មរោងចក្រ ។

ក្រុមកម្មករពន្យល់ថា ដើម្បីស្វែងរកការងារធ្វើនៅតាមរោងចក្រ ពួកគេត្រូវការតម្រង់ជួរឲ្យបានមុនគេនៅពេលព្រឹក នៅក្រៅរោងចក្រ រង់ចាំសំណាងមកដល់ ក្រែងទទួលបានការជួលឲ្យចូលបម្រើការងារ ។

យោងតាមសេចក្តីថ្លែងការណ៍របស់អ្នកសម្របសម្រួលប្លុកធុរកិច្ចព្រំដែន(BEF) លោក Jesus Manuel Salayandia បានឲ្យដឹងកាលពីខែកុម្ភៈថា សេដ្ឋកិច្ចព្រំដែនដែលពឹងផ្អែកខ្លាំងលើផលិតកម្មនាំចេញ បានបាត់បង់ការងារជាង ១០ម៉ឺនកន្លែងរួចទៅហើយនៅតំបន់ភាគខាងជើងម៉ិកស៊ិក ចាប់ពីទីក្រុង Tijuana ដល់ទីក្រុង Matamoros នៅក្នុងរយៈពេលប៉ុន្មានខែចុងក្រោយនេះ ក្នុងនោះក្រុង Ciudad Juarez បានបាត់បង់ការងារ ៤៥.០០០កន្លែង ។ 

កាលពីសប្តាហ៍មុន ប្រធានាធិបតីសហរដ្ឋអាមេរិកលោក Donald Trump បានដំឡើងពន្ធ ២៥ភាគរយលើការនាំចូលពីម៉ិកស៊ិក និងកាណាដា ក្រោយមកលោកបានបន្ធូរបន្ថយរយៈពេល ១ខែលើទំនិញដែលអនុលោមតាមកិច្ចព្រមព្រៀង USMCA ដែលជាកិច្ចព្រមព្រៀងពាណិជ្ជកម្មក្នុងតំបន់ ។

យោងតាមការបញ្ជាក់របស់អ្នកវិភាគ Jose Mario Sanchez Soledad របស់កាសែតក្នុងស្រុក La Verdad Juarez បានឲ្យដឹងថា បើសិនជាពន្ធត្រូវបានដាក់ហើយនោះ ផលិតកម្មតាមរោងចក្រនឹងមិនអាចទ្រទ្រង់បានឡើយ ហើយរោងចក្រជាច្រើន នឹងត្រូវបិទទ្វារ ដោយសារការបាត់បង់ការងារដ៏ធំនៅក្នុងតំបន់មួយដែលគ្មានឧស្សាហកម្មជម្រើសផ្សេង ។

ការគំរាមកំហែងដំឡើងពន្ធរបស់លោក Trump បង្កការឈឺចាប់ដល់ម៉ិកស៊ិក ក្រោយគ្រោះរាំងស្ងួតដ៏អាក្រក់កាលពីឆ្នាំមុន ។ ក្រុមវិនិយោគទុន មានការព្រួយបារម្ភផងដែរពីការរុះរើប្រព័ន្ធច្បាប់ជម្លោះ និងអំណាចសភាមិនបានត្រួតពិនិត្យរបស់គណបក្សកាន់អំណាច Morena ។

ទោះបីជាយ៉ាងណាក៏ដោយ ប្រធានាធិបតីម៉ិកស៊ិកលោកស្រី Claudia Sheinbaum បានិយាយយ៉ាងទទួចថា សេដ្ឋកិច្ចរបស់ម៉ិកស៊ិកនៅរឹងមាំខ្លាំង ហើយកាលពីពេលថ្មីនេះ លោកស្រីបានដាក់ចេញផែនការមានគោលដៅពង្រឹងការវិនយោគទុន និងជំនួសការនាំចូលជាមួយនឹងផលិតកម្មក្នុងស្រុកច្រើនជាងមុន ៕