កំពង់ចាម៖ អាជ្ញាធរឃុំទងត្រឡាច ស្រុកស្រីសន្ធរ បានសហការជាមួយ​ក្រុមការងារ​ចុះ​ជួយ​ឃុំ​ទង​ត្រឡាច រៀបចំវេទិកាសាធារណៈ ដែលមានប្រជាពលរដ្ឋប្រមាណ ៥០០នាក់ បានចូលរួម ខណៈ​ក្តី​កង្វល់ និងសំណូមពរជាច្រើន ក៏ត្រូវបានលើឡើងក្នុងអង្គវេទិកានោះ ហើយត្រូវ​បាន​ដោះ​ស្រាយ​ភ្លាមៗ​ជូន​ប្រជាពលរដ្ឋផងដែរ ។

សម្រាប់សំណូមពរ ដែលបានស្នើដោយប្រជាពលរដ្ឋ នៅក្នុងវេទិកាសាធារណៈ ដែល​ធ្វើ​ឡើង​កាល​ពី​ថ្ងៃទី១៤ ខែមីនា ឆ្នាំ២០២៥ ស្ថិតក្នុងសាលាបឋមសិក្សាបឹងទីង ឃុំទងត្រឡាច រួមមាន បញ្ហា​សុខាភិបាល អប់រំ សង្គមកិច្ច ភូមិ-ឃុំមានសុវត្ថិភាព និងការអភិវឌ្ឍជាដើម ។

ក្នុងវេទិកាសាធារណៈនោះឯកឧត្តមឧកញ៉ា ឡូវ ហ៊ឹង ប្រធានក្រុមការងារចុះជួយឃុំទងត្រឡាច រាជ​រដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជា តាំងពីអាណត្តិមុខ ត​មកដ​ល់​អាណត្តិ​ទី៧នេះ គឺនៅតែបន្តធ្វើវេទិកាសាធារណៈ ដើម្បីជួបជាមួយប្រជាពលរដ្ឋ បានស្ដាប់ដោ​យ​ផ្ទាល់​នូវកង្វល់ ឬក្ដីព្រួយបារម្ភអ្វីមួយ ហើយចង់ឲ្យមានការដោះស្រាយ ។

ឯកឧត្តមបន្តថា ក្នុងនាមជាក្រុមការងារចុះមូលដ្ឋាន ឬអាជ្ញាធរភូមិឃុំ ដែលជា​ភ្នែក​ជា​ច្រមុះ​រប​ស់​រាជ​រដ្ឋាភិបាល គឺត្រូវតែស្ដាប់ និងនាំយកនូវក្តីកង្វល់ ឬសំណូមពរទាំងអស់នោះ មកធ្វើការ​ដោះ​ស្រាយ​ឲ្យ​អស់ពីលទ្ធភាព ហើយបើមិនអាចដោះស្រាយបាន ត្រូវធ្វើរបាយការណ៍ទៅថ្នាក់ដឹកនាំ ដើម្បី​ដោះ​ស្រាយជូនប្រជាពលរដ្ឋ ។

ឧកញ៉ា ឡូវ ហ៊ឹង បានបន្ថែមថា តែយ៉ាងណាក្នុងនាមជាអាជ្ញាធរមូលដ្ឋាន ត្រូវតែខិតខំ ដោះ​ស្រាយ​សំណូមពរទាំងអស់នោះ ក៏ដូចជារួមគ្នាធ្វើការអភិវឌ្ឍមូលដ្ឋាន ការ​ផ្ដល់​សេវា​រដ្ឋបាល​ឲ្យ​បាន​ឆាប់រហ័ស ទាន់ពេលវេលា អនុវត្តឲ្យបានខ្ជាប់ខ្ជួនគោលនយោបាយភូមិ-ឃុំ មានសុវត្ថិភាព ជា​ពិសេសត្រូវធ្វើអំពើល្អចំពោះប្រជាពលរដ្ឋ ។

ក្នុង​ឱកាសនោះ ប្រធានក្រុមការងារចុះជួយឃុំទងត្រឡាច និងក្រុមការងារ គឺបាន​ជួយ​ដោះ​ស្រាយ និងបាននាំយកអំណោយ និងថវិការបស់សម្ដេចតេជោ ហ៊ុន សែន ប្រធាន​គណបក្ស​ប្រជាជន​កម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្ដល់​ដល់​ប្រជាពលរដ្ឋដែលសំណូមពរ រួមមានផ្ដល់ថវិកាដល់កុមារកំព្រា កុមារមានជីវភាពខ្វះខាត ទិញ​កង់ ផ្ដល់ប្រាក់ឧបត្ថម្ភដល់អ្នកជំងឺ និងចែកថ្នាំព្យាបាលជំងឺដល់ពលរដ្ឋទាំង ៥០០គ្រួសារ ដែល​បានចូលរួមក្នុងវេទិកានេះ ខណៈឧកញ៉ា ជា លាងហុង ឧបត្ថម្ភម្សៅទឹ​ក​ដោះ​គោ​ដល់​ទារក​ដែល​ឪពុកម្ដាយមានជីវភាពខ្វះខាត, ឧកញ៉ា អែល សារ៉ុម ឧបត្ថម្ភកុំព្យូរទ័រចំនួន ២គ្រឿង ឧបត្ថម្ភថវិកាទិញឯកសណ្ឋានប្រជាការពារ និងលោក ពូន វណ្ណា ឧបត្ថម្ភថវិកាមួយចំនួន សម្រាប់ដោះស្រាយការងាររដ្ឋបាលក្នុងឃុំទងត្រឡាច ៕

អត្ថបទ បាន សុខរិទ្ធិ