ប្រធានាធិបតីអាមេរិក លោក Donald Trump បានចុះហត្ថលេខាលើក្រឹត្យមួយ កាលពីថ្ងៃសុក្រ (ទី១៤ ខែមីនា) ដើម្បីស្វែងរកការរុះរើទីភ្នាក់ងារសហព័ន្ធចំនួន ៧ បន្ថែមទៀត ក្នុងនោះរួមមានទាំងស្ថាប័នដែលគ្រប់គ្រងវិទ្យុសំឡេងសហរដ្ឋអាមេរិក និងប្រព័ន្ធផ្សព្វផ្សាយផ្សេងទៀតដែលផ្តល់មូលនិធិដោយរដ្ឋាភិបាល នៅជុំវិញពិភពលោក។

លោក Trump បានបញ្ជាដោយផ្ទាល់ទៅប្រធានទីភ្នាក់ងារទាំងនេះ ជាស្ថាប័នមិនសូវល្បីភាគច្រើនថា ត្រូវដោះស្រាយបញ្ហានានា ដូចជាការសម្រុះសម្រួលផ្នែកការងារ និងការទប់ស្កាត់ការគ្មានផ្ទះសម្បែងជាដើម ដើម្បីលុបបំបាត់មុខងារទាំងឡាយណាដែលមិនមានច្បាប់កំណត់។

ក្រឹត្យនេះបានកំណត់ថា ប្រធានទាំងនោះក៏គួរតែ «កាត់បន្ថយការអនុវត្តមុខងារកំណត់ដោយច្បាប់របស់ពួកគេ និងបុគ្គលិកដែលពាក់ព័ន្ធ ឲ្យដល់កម្រិតមានវត្តមាន និងមុខងារអប្បបរមាដែលតម្រូវដោយច្បាប់»។ មិនខុសពីវិធានការជាច្រើនរបស់ប្រធានាធិបតី នៅក្នុងកិច្ចប្រឹងប្រែងទូលំទូលាយរបស់លោក ក្នុងការបង្រួញរដ្ឋាភិបាល ក្រឹត្យនេះហាក់ដូចជាសាកល្បងព្រំដែននៃសិទ្ធិអំណាចរបស់លោក។

ជាឧទាហរណ៍ ស្ថាប័នមេរបស់វិទ្យុសំឡេងសហរដ្ឋអាមេរិក ដែលជាទីភ្នាក់ងារសហរដ្ឋអាមេរិក សម្រាប់ប្រព័ន្ធផ្សព្វផ្សាយសកល ត្រូវបានសភាកំណត់ជាទីភ្នាក់ងារឯករាជ្យ ហើយសភាបានអនុម័តច្បាប់ នៅឆ្នាំ២០២០ ដែលមានបំណងកំណត់អំណាចនៃនាយកប្រតិបត្តិ ដែលត្រូវបានតែងតាំងដោយប្រធានាធិបតីរបស់ទីភ្នាក់ងារនេះ។

បន្ថែមពីលើវិទ្យុសំឡេងសហរដ្ឋអាមេរិក ទីភ្នាក់ងារសម្រាប់ប្រព័ន្ធផ្សព្វផ្សាយសកលមួយនេះ ផ្តល់មូលនិធិដល់វិទ្យុអឺរ៉ុបសេរី/វិទ្យុសេរីភាព និងវិទ្យុអាស៊ីសេរី។ ស្ថាប័ននេះដែលមានថវិកាប្រហែល ២៧០លានដុល្លារអាមេរិក និងបុគ្គលិកជាង ២.០០០នាក់ ចាក់ផ្សាយជា ៤៩ភាសា។ ប្រព័ន្ធផ្សព្វផ្សាយទាំងនេះ មានបំណងផ្តល់ព័ត៌មានមិនលម្អៀងដល់អ្នកស្ដាប់ ជុំវិញពិភពលោក ប៉ុន្តែលោក Trump បានរិះគន់ថា ប្រព័ន្ធផ្សព្វផ្សាយទាំងនេះ មិនបានអនុវត្តតាមគោលការណ៍របស់ខ្លួនឡើយ ចាប់តាំងពីអាណត្តិដំបូងរបស់លោក៕