ទីបញ្ជាការកណ្តាលរបស់សហរដ្ឋអាមេរិក កាលពីថ្ងៃសុក្រ (ទី១៤ ខែមីនា) បានប្រាប់ថា ខ្លួនបានធ្វើការវាយប្រហារតាមអាកាស ក្នុងកិច្ចសហប្រតិបត្តិការជាមួយប្រទេសអ៊ីរ៉ាក់ ដោយបានសម្លាប់មេដឹកនាំជាន់ខ្ពស់របស់ក្រុម ISIS នៅក្នុងប្រទេសនេះ គឺលោក Abdallah Makki Muslih al-Rifai ដែលត្រូវគេស្គាល់ថា «Abu Khadijah» និងប្រតិបត្តិកររបស់ក្រុម ISIS ម្នាក់ផ្សេងទៀត។

ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់ពីទីតាំង ឬកាលបរិច្ឆេទដែលវីដេអូនេះត្រូវបានថតដោយឯករាជ្យបានឡើយ។ បញ្ជាការកណ្តាល បានឲ្យដឹងថា បន្ទាប់ពីមានការវាយប្រហារដែលយោធាអាមេរិក បានប្រាប់ថា បានកើតឡើង កាលពីថ្ងៃព្រហស្បតិ៍ (ទី១៣ ខែមីនា) ការធ្វើតេស្ត DNA លើអដ្ឋិធាតុរបស់អ្នកស្លាប់ បានបញ្ជាក់ថា លោក Abu Khadijah ត្រូវបានសម្លាប់។

ចំណែកលោកប្រធានាធិបតីអាមេរិក Donald Trump ក្រោយមក បានបង្ហោះនៅលើបណ្ដាញសង្គម Truth Social ថា៖ «ថ្ងៃនេះ មេដឹកនាំរត់គេចខ្លួនរបស់ក្រុម ISIS នៅក្នុងប្រទេសអ៊ីរ៉ាក់ ត្រូវបានសម្លាប់ហើយ»។

ជាមួយគ្នានេះ សេចក្តីថ្លែងការណ៍របស់យោធាអាមេរិក បានបញ្ជាក់ថា លោក Abu Khadijah ក៏ជា «មេដឹកនាំរបស់ក្រុម ISIS លំដាប់ទី២» ដែល «បន្តទទួលខុសត្រូវ សម្រាប់ប្រតិបត្តិការនានា ការដឹកជញ្ជូន និងផែនការដែលធ្វើឡើងដោយក្រុម ISIS នៅទូទាំងពិភពលោក»៕