អ្នកវិភាគនយោបាយអ៊ីរ៉ង់ កាលពីថ្ងៃសុក្រ (ទី១៤ ខែមីនា) បាននិយាយថា ការសម្របសម្រួល រវាងប្រទេសអ៊ីរ៉ង់ ចិន និងរុស្ស៊ី មានសារៈសំខាន់ណាស់ សម្រាប់ការដោះស្រាយបញ្ហាប្រឈមថ្មីនានា ដែលសហគមន៍អន្តរជាតិ កំពុងជួបប្រទះ។

អ្នកវិភាគ លោក Foad Izadi បានធ្វើការកត់សម្គាល់បែបនេះ ខណៈកំពុងធ្វើអត្ថាធិប្បាយ លើកិច្ចប្រជុំត្រីភាគី ស្តីពីបញ្ហានុយក្លេអ៊ែរអ៊ីរ៉ង់ ដែលធ្វើឡើងនៅទីក្រុងប៉េកាំង ក្នុងថ្ងៃតែមួយ។

គួរបញ្ជាក់ថា កិច្ចប្រជុំនេះដែលធ្វើប្រធានដោយអនុរដ្ឋមន្ត្រីការបរទេសចិន លោក Ma Zhaoxu និងចូលរួមដោយអនុរដ្ឋមន្ត្រីការបរទេសរុស្ស៊ី លោក Ryabkov Sergey Alexeevich និងអនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បានផ្តោតលើការរិះរកផ្លូវដ៏មានសក្ដានុពល ក្នុងការស្តារឡើងវិញនូវកិច្ចប្រឹងប្រែងការទូតដែលមានគោលដោះស្រាយបញ្ហានុយក្លេអ៊ែរអ៊ីរ៉ង់។

វឌ្ឍនភាពនេះកើតមានឡើង នៅពេលដែលរដ្ឋបាលរបស់លោក Donald Trump បានជំរុញឲ្យមានការចរចា ស្ដីពីកិច្ចព្រមព្រៀងថ្មីមួយដែលនឹងរារាំងទីក្រុងតេអេរ៉ង់ជាអចិន្ត្រៃយ៍ កុំឲ្យអភិវឌ្ឍអាវុធនុយក្លេអ៊ែរ។ អំឡុងសន្និសីទសារព័ត៌មាន ក្រោយកិច្ចប្រជុំនោះ អនុរដ្ឋមន្ត្រីការបរទេស លោក Ma បានសង្កត់ធ្ងន់ថា ភាគីពាក់ព័ន្ធទាំងអស់ គួរតែដោះស្រាយឫសគល់នៃវិបត្តិបច្ចុប្បន្ន ដោយបញ្ជាក់ថា ចិន អ៊ីរ៉ង់ និងរុស្ស៊ី បដិសេធទាំងការប្រើប្រាស់ទណ្ឌកម្ម និងការគំរាមកំហែងប្រើកម្លាំងយោធា។

អំឡុងកិច្ចសម្ភាសន៍ជាមួយបណ្តាញទូរទស្សន៍ចិន Global Television Network (CGTN) លោក Izadi បានប្រាប់ថា៖ «សម្រាប់អាស៊ីអឺរ៉ុប យើងមានប្រទេសធំៗចំនួន៣ គឺអ៊ីរ៉ង់ ចិន និងរុស្ស៊ី។ ដូច្នេះ ការសម្របសម្រួល រវាងប្រទេសទាំងនេះ ដោយសារមានបញ្ហាប្រឈមថ្មីៗដែលសហគមន៍អន្តរជាតិកំពុងជួបប្រទះ នឹងមានសារៈសំខាន់ណាស់»។

លោក Izadi បានចង្អុលបង្ហាញថា៖ «ទំនាក់ទំនងអ៊ីរ៉ង់-ចិន គឺល្អប្រសើរ។ វាមិនមែនជាផលប្រយោជន៍របស់ប្រទេសចិន ដែលអ៊ីរ៉ង់ត្រូវប្រឈមមុខនឹងការលំបាកបន្ថែមទៀតពីសហរដ្ឋអាមេរិកនោះឡើយ»៕