អ្នកនាំពាក្យម្នាក់ កាលពីថ្ងៃសុក្រ (ទី១៤ ខែមីនា) បាននិយាយថា ក្រសួងថាមពលសហរដ្ឋអាមេរិក (DOE) បានកំណត់សម្ព័ន្ធមិត្តកូរ៉េខាងត្បូងថា ជាប្រទេស «រសើប» បន្ទាប់ពីប្រធានាធិបតីកូរ៉េខាងត្បូង បានដាក់ចេញច្បាប់អាជ្ញាសឹករយៈពេលខ្លី និងចំពេលមានការពិភាក្សា អំពីលទ្ធភាពដែលថា ទីក្រុងសេអ៊ូលអាចអភិវឌ្ឍអាវុធនុយក្លេអ៊ែរ។

នៅក្នុងការឆ្លើយតបជាលាយលក្ខណ៍អក្សរ ចំពោះសំណួររបស់សារព័ត៌មាន Reuters DOE បានឲ្យដឹងថា រដ្ឋបាលរបស់ប្រធានាធិបតីមុន គឺលោក Joe Biden បានដាក់ប្រទេសកូរ៉េខាងត្បូងក្នុងកម្រិតទាបបំផុតនៃបញ្ជីបណ្ដាប្រទេសរសើប និងត្រូវបានកំណត់ផ្សេងៗទៀត នៅក្នុងខែមករា ពោលគឺមិនយូរប៉ុន្មានមុនពេលលោក Biden ចាកចេញពីតំណែង។

តែយ៉ាងណាក្ដី ក្រសួងនេះមិនបានពន្យល់ពីមូលហេតុដែលប្រជាជាតិអាស៊ីមួយនេះ ត្រូវបានបញ្ចូលទៅក្នុងបញ្ជីនោះទេ ហើយក៏មិនបានបង្ហាញថា លោកប្រធានាធិបតី Donald Trump មានទំនោរចង់ផ្លាស់ប្តូរវិធានការនេះដែរ។ អ្នកនាំពាក្យរូបនោះបាននិយាយថា ទីក្រុងសេអ៊ូលប្រឈមនឹងការរឹតបន្តឹងថ្មី ជុំវិញកិច្ចសហប្រតិបត្តិការទ្វេភាគី ក្នុងវិស័យវិទ្យាសាស្ត្រ និងបច្ចេកវិទ្យា។

សេចក្តីរាយការណ៍របស់ប្រព័ន្ធផ្សព្វផ្សាយ បានឲ្យដឹងថា ការកំណត់នេះ នឹងចូលជាធរមាន នៅថ្ងៃទី១៥ ខែមេសា។ ក្រសួងការបរទេសកូរ៉េខាងត្បូង បានប្រាប់ថា រដ្ឋាភិបាលកំពុងយកចិត្តទុកដាក់ លើបញ្ហានេះ ហើយកំពុងប្រាស្រ័យទាក់ទងយ៉ាងជិតស្និទ្ធជាមួយទីក្រុងវ៉ាស៊ីនតោន៕