ភ្នំពេញ៖ មន្ត្រីជាន់ខ្ពស់ នៃអគ្គនាយកដ្ឋានគយ និងរដ្ឋាករកម្ពុជា បានឲ្យដឹងថា គិតចាប់ពីថ្ងៃទី៩ ខែកញ្ញា រហូតត្រឹមថ្ងៃទី២៥ ខែវិច្ឆិកា ឆ្នាំ២០២១ មានរថយន្តទាំងចង្កូតស្តាំ និងឆ្វេង ចំនួនសរុប ១ ៦៤០គ្រឿង បានចូលមកបង់ពន្ធ និងអាករនាំចូល និងតម្កល់ប្រាក់កក់ស្មើនឹងទឹកប្រាក់សរុបចំនួនប្រមាណ១៧,៣ដុល្លារ ដែលនេះជាតួលេខមួយល្អ។
នៅក្នុងសន្និសីទសារព័ត៌មាន ស្តីពីវឌ្ឍនភាពនៃការអនុវត្តការប្រមូលពន្ធលើយានយន្តគ្មានពន្ធនិងអាករ នាំចូលដែលមានស្រាប់ក្នុងប្រទេស នៅព្រឹកថ្ងៃទី២៦ វិច្ឆិកា ឆ្នាំ២០២១នេះ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានមានប្រសាសន៍ថា បើគិតក្នុងរយៈពេល១ខែក្រោយនេះ ចំនួនរថយន្តស្តាំនិងឆ្វេងដែលធ្វើការបង់ពន្ធនិងអាករនាំចូលមានលទ្ធផលល្អប្រសើរ បើធៀបនឹងពេលប្រកាសបើកយុទ្ធនាការដំបូង ដែលជាមធ្យមក្នុង១ថ្ងៃ មានប្រមាណ ៣០គ្រឿង។ ឯកឧត្តមបានឲ្យដឹងទៀតថា នៅទូទាំងកម្ពុជាបច្ចុប្បន្ន រថយន្តគ្មានពន្ធ និងអាករនាំចូល ដែលជ្រកក្រោមស្លាកលេខផ្សេងៗមានចំនួនប្រមាណ ១ម៉ឺនគ្រឿង។
ជាថ្មីម្តងទៀត ឯកឧត្តមអគ្គនាយកបានអំពាវនាវដល់ម្ចាស់រថយន្តទាំងអស់ ដែលជ្រកក្រោមផ្លាកលេខផ្សេងៗគ្មានពន្ធ គួរបំពេញកាតព្វកិច្ចឲ្យបានបានមុនបំណាច់ឆ្នាំ២០២១នេះ ដើម្បីទទួលបានការអនុគ្រោះបន្ធូរបន្ថយពន្ធ និងអាករចំនួន ១០%។ ដោយឡែក រថយន្តចង្កូតស្តាំ ត្រូវមកប្រកាសបង់ពន្ធ និងកែចង្កូតពីស្តាំមកឆ្វេងឲ្យបានរួចរាល់ យ៉ាងយូរត្រឹមថ្ងៃទី៣០ ខែមិថុនា ឆ្នាំ២០២២៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
