មនុស្សរាប់សែននាក់បានចេញតវ៉ាតាមដងផ្លូវនានាក្នុងទីក្រុង ប៊ុយដាប៉ែស (Budapest) ទីក្រុង បែលហ្គ្រាដ(Belgrade) និងទីក្រុង ប៊ូឆារ៉េស (Bucharest) កាលពីចុងសប្ដាហ៍នេះ សម្រាប់ការតវ៉ាដាច់ដោយឡែកពីគ្នា ដែលគាំទ្រអឺរ៉ុប និងប្រឆាំងរុស្ស៊ី។

មនុស្សយ៉ាងហោចណាស់៥ម៉ឺននាក់បានដើរដង្ហែក្បួនក្នុងប្រទេសហុងគ្រី ដើម្បីទាមទារឱ្យបញ្ចប់ការគ្រប់គ្រងរបស់លោក Viktor Orban ដែលមានទំនោរគាំទ្ររុស្ស៊ី ខណៈប្រទេសស៊ែរប៊ីបានមើលឃើញការប្រមូលផ្តុំប្រឆាំងរដ្ឋាភិបាលដ៏ធំបំផុតរបស់ខ្លួននៅក្នុងប្រវត្តិសាស្រ្តថ្មីៗនេះ ហើយមនុស្សរាប់ពាន់នាក់នៅក្នុងប្រទេស      រូម៉ានី បានធ្វើបាតុកម្មបង្ហាញការគាំទ្រដល់សហភាពអឺរ៉ុប។     

នៅទីក្រុងប៊ុយដាប៉ែស ពលរដ្ឋហុងគ្រី បានចេញតវ៉ាប្រឆាំងលោក Orban ដែលចាត់ទុកថាជាសម្ព័ន្ធមិត្តជិតស្និទ្ធបំផុតរបស់ លោក Vladimir Putin ក្នុងចំណោមក្រុមមេដឹកនាំសហភាពអឺរ៉ុប ដើម្បីគាំទ្រគណបក្សប្រឆាំងដែលគាំទ្រអឺរ៉ុប កំពុងកើនឡើង ដឹកនាំដោយលោក Peter Magyar ។   

ក្រោមការដឹកនាំរបស់លោក Vucic ប្រទេសស៊ែរប៊ីបានរក្សាទំនាក់ទំនងល្អជាមួយរុស្ស៊ី ដោយបដិសេធមិនដាក់ទណ្ឌកម្មលើសម្ព័ន្ធមិត្តរបស់ខ្លួន បន្ទាប់ពីការលុកពេញបន្ទុកក្នុងប្រទេសអ៊ុយក្រែន ។ កាលពីចុងសប្ដាហ៍នោះដែរក្រុមបាតុករជាង១០ម៉ឺននាក់បានសម្រុកទៅកាន់ទីក្រុងបែលហ្គ្រាដ(Belgrade)ប្រទេសស៊ែរប៊ី ក្នុងការប្រមូលផ្តុំដ៏ធំបំផុតមួយក្នុងរយៈពេលជាច្រើនទសវត្សរ៍ ដោយនិស្សិត និងបុគ្គលិករដ្ឋបានប្រឈមក្រុមអ្នកគាំទ្រប្រធានាធិបតីលោក Aleksandar Vucic និងនគរបាលបង្ក្រាបកុបកម្ម ជុំវិញសោកនាកម្មបាក់រលំដំបូលស្ថានីយ៍រថភ្លើងសម្លាប់មនុស្សជាង១០នាក់។   

នៅប្រទេសរូម៉ានីកាលពីចុងសប្ដាហ៍នេះ មនុស្សរាប់ពាន់នាក់បានប្រមូលផ្តុំគ្នានៅទីក្រុងប៊ូឆារ៉េស ដើម្បីការពារអនាគតរបស់ប្រទេសរបស់ពួកគេនៅអឺរ៉ុប និងបញ្ចេញសំឡេងប្រឆាំងរបស់ពួកគេចំពោះការកើនឡើងនូវមនោសញ្ចេតនាជាតិនិយម និងការប្រឆាំងអឺរ៉ុប។ 

រូម៉ានីគ្រោងរៀបចំការបោះឆ្នោតប្រធានាធិបតីពីរជុំរបស់ខ្លួន នៅថ្ងៃទី៤និង១៨ ខែឧសភា បន្ទាប់ពីតុលាការកំពូលរបស់ប្រទេសនេះបានលុបចោលការបោះឆ្នោតដំបូងកាលពីខែធ្នូ ដោយសារការចោទប្រកាន់ពីការជ្រៀតជ្រែករបស់រុស្ស៊ី៕