ខុទ្ធកាល័យរបស់លោក Erdogan បាននិយាយកាលពីថ្ងៃអាទិត្យ ទី១៦ មីនា ថា ប្រធានាធិបតីទួរគី លោក Tayyip Erdogan បានសន្ទនាតាមទូរស័ព្ទជាមួយប្រធានាធិបតីសហរដ្ឋអាមេរិក លោក Donald Trump ដោយបានពិភាក្សាអំពីកិច្ចខិតខំប្រឹងប្រែងដើម្បីបញ្ចប់សង្គ្រាមរវាងរុស្ស៊ី និងអ៊ុយក្រែន និងដើម្បីស្ដារស្ថិរភាពនៅក្នុងប្រទេសស៊ីរីឡើងវិញ។

សេចក្តីថ្លែងការណ៍បាននិយាយថា លោក Erdogan បានប្រាប់ លោក Trump ថា ប្រទេសទួរគី គាំទ្រ «គំនិតផ្តួចផ្តើមដោយផ្ទាល់និងរឹងមាំរបស់លោក ដើម្បីបញ្ចប់សង្រ្គាមរវាងរុស្ស៊ី និងអ៊ុយក្រែន ហើយទួរគីនឹងបន្តខិតខំដើម្បី «សន្តិភាពដ៏ត្រឹមត្រូវ និងយូរអង្វែង»។

លោក Erdogan ក៏បាននិយាយផងដែរអំពី «សារៈសំខាន់នៃការរួមចំណែករួមគ្នាដល់ការដកទណ្ឌកម្មលើប្រទេសស៊ីរី ដើម្បីស្ដារស្ថិរភាព ធ្វើឱ្យរដ្ឋបាលថ្មីដំណើរនិងគាំទ្រដល់ការធ្វើឱ្យមានប្រក្រតីភាព ហើយនេះនឹងអនុញ្ញាតឱ្យប្រជាជនស៊ីរីត្រឡប់ទៅស្រុកកំណើតរបស់ពួកគេវិញ។

ទួរគី ក៏រំពឹងផងដែរនូវចំណាត់ការពីសហរដ្ឋអាមេរិកទាក់ទងនឹងការប្រយុទ្ធប្រឆាំងអំពើភេរវកម្ម ដោយយកមកពិចារណាពីផលប្រយោជន៍របស់ប្រទេសទួរគី។

ក្នុងការប្រយុទ្ធប្រឆាំងក្រុមរដ្ឋឥស្លាមនៅប្រទេសស៊ីរី សហរដ្ឋអាមេរិក មានសម្ព័ន្ធមិត្តជាមួយកងជីវពលឃឺដស៊ីរី ដែលទួរគីបានចាត់ទុកថាជាក្រុមភេរវករ។ ទួរគីបានរិះគន់យ៉ាងខ្លាំងចំពោះជំហររបស់សហរដ្ឋអាមេរិក លើរឿងនេះ ថាជាការក្បត់សម្ព័ន្ធមិត្តណាតូ។