មេបញ្ជាការឆ្មាំបដិវត្តន៍អ៊ីរ៉ង់ លោក Hossein Salami បានប្តេជ្ញាកាលពីថ្ងៃអាទិត្យថា នឹងផ្តល់ការឆ្លើយតបយ៉ាងម៉ឺងម៉ាត់ និងដ៏មហន្តរាយដល់សត្រូវណាមួយ ដែលធ្វើការគំរាមកំហែង។

លោក Salami បាននិយាយថា ក្រុមហ៊ួរទីនៅប្រទេសយេម៉ែន ទទួលយកការសម្រេចចិត្តជាយុទ្ធសាស្ត្រ និងធ្វើប្រតិបត្តិការដោយខ្លួនឯង ហើយទទួលខុសត្រូវចំពោះអ្វីៗគ្រប់យ៉ាងដែលពួកគេធ្វើ។

ប្រធានាធិបតីសហរដ្ឋអាមេរិក លោក Donald Trump បានបើកការវាយប្រហារប្រឆាំងក្រុមហ៊ួរទី នៅប្រទេសយេម៉ែន កាលពីថ្ងៃសៅរ៍ ទី១៥ មីនា ជុំវិញការវាយប្រហាររបស់ក្រុមនេះ ទៅលើនាវាច្រើនគ្រឿងនៅសមុទ្រក្រហម ដោយព្រមានថា ប្រសិនបើការវាយប្រហាររបស់ក្រុមហ៊ួរទី មិនបញ្ឈប់ «អ្នកនឹងជួបប្រទះនូវអ្វីដែលអ្នកពុំដែលជួបប្រទះពីមុនមក»។

នៅក្នុងការបង្ហោះនៅលើបណ្តាញ Truth Social លោកTrump បានព្រមានអ៊ីរ៉ង់ ជាអ្នកគាំទ្រដ៏សំខាន់របស់ក្រុមហ៊ួរទីថា ប្រទេសនេះចាំបាច់ត្រូវបញ្ឈប់ជាបន្ទាន់នូវការគាំទ្រក្រុមហ៊ួរទី។ លោកនិយាយថា ប្រសិនបើអ៊ីរ៉ង់គំរាមអាមេរិក «អាមេរិកនឹងឲ្យអ្នកទទួលខុសត្រូវទាំងស្រុង ហើយយើងនឹងមិនអត់ឱនឲ្យឡើយ»

លោក Salami បានឆ្លើយតបថា «យេម៉ែន គឺជាប្រទេសសេរី និងឯករាជ្យ នៅក្នុងទឹកដីផ្ទាល់របស់ខ្លួន ហើយមានគោលនយោបាយជាតិឯករាជ្យ» ។