កូរ៉េខាងត្បូង ហាក់ដូចជានៅកំពុងស្ថិតនៅក្រោមភាពតានតឹងកាន់តែខ្លាំងឡើង ខណៈអ្នកនយោបាយនានាត្រូវបានជំរុញឱ្យគោរពសេចក្តីសម្រេចនាពេលខាងមុខ ពីតុលាការធម្មនុញ្ញ ស្របពេលមានការតវ៉ាកាន់តែធំនៅចុងសប្តាហ៍។ តុលាការទំនងជានឹងប្រកាសសាលក្រមរបស់ខ្លួនលើសំណុំរឿងចោទប្រកាន់ទម្លាក់តំណែងរបស់លោកប្រធានាធិបតី Yoon Suk Yeol នៅសប្តាហ៍នេះ។

មេដឹកនាំសភារបស់គណបក្សអំណាចប្រជាជន PPP ដែលកំពុងកាន់អំណាច គឺលោកតំណាងរាស្រ្ត Kweon Seong-dong កាលពីថ្ងៃអាទិត្យ (១៦ មីនា) បាននិយាយថា គណបក្សនឹងទទួលយកសាលក្រមចុងក្រោយរបស់តុលាការធម្មនុញ្ញដើម្បីកំណត់ជោគវាសនារបស់លោកប្រធានាធិបតី Yoon មិនថាលទ្ធផលនោះអំណោយផលដល់បក្សកាន់អំណាចឬក៏អត់នោះទេ។

លោក Kweon បានប្រាប់អ្នកសារព័ត៌មាននៅរដ្ឋសភាថា "មន្រ្តីបក្សកាន់អំណាចប្រកាន់ជំហរគាំទ្រសាលក្រម មិនថាមានលទ្ធផលបែបណាក៏ដោយ"។ ការលើកឡើងនេះបានកើតឡើងស្របពេលមានការរំពឹងទុកថា សមាជិកសភាបក្សកាន់អំណាចមួយចំនួនបានបង្កើនសម្ពាធលើតុលាការធម្មនុញ្ញ ដោយការជំរុញឱ្យក្រុមបាតុករគាំទ្រលោក Yoon បំផ្លិចបំផ្លាញតុលាការ ប្រសិនបើស្ថាប័នផ្លូវច្បាប់មួយនេះគាំទ្រការចោទប្រកាន់ទម្លាក់តំណែងនោះ។

គួរឱ្យដឹងថា កាលពីចុងសប្ដាហ៍ មនុស្សម្នារាប់ពាន់នាក់បានសម្រុកចេញតវ៉ាយ៉ាងតានតឹងទូទាំងរដ្ឋធានីកូរ៉េខាងត្បូង ដើម្បីគាំទ្រ ឬប្រឆាំងលោក Yoon ខណៈសាលក្រមខិតកាន់តែជិត៕