នៅវេលាម៉ោង ៥និង៣០នាទីល្ងាច ថ្ងៃទី១៦ ខែមីនា ឆ្នាំ២០២៥ មាន​ខ្យល់​កន្ត្រាក់​យ៉ាង​ខ្លាំង​លា​យ​ឡំ​ជាមួយទឹកភ្លៀង បានកើតឡើង​ស្ទើរ​គ្រប់​ទីកន្លែង​នៅ​តាម​បណ្តា​ស្រុក​ក្រុង​នៅ​ទូទាំង​ខេត្ត​ក្រចេះ។

ជាក់ស្ដែង ស្រុកចិត្របុរី ក៏ជាស្រុកមួយក្នុងចំណោមស្រុក៦ នៅខេត្តក្រចេះ ដែលជួប​គ្រោះ​ថ្នាក់​ខ្យល់​កន្ត្រាក់ និងបង្កផលប៉ះពាល់ដល់លំនៅដ្ឋានរបស់ប្រជាពលរដ្ឋយ៉ាងធ្ងន់ធ្ងរផងដែរ។

លោក យិន វណ្ណៈ អភិបាលស្រុកចិត្របុរី បានដឹងនៅព្រឹកនេះថា ព័ត៌មាន​បឋម​ដែល​លោក​ទទួល​បាន​នៅក្នុងស្រុកចិត្របុរី គឺមានឃុំចំនួន ៦ឃុំ រួមមាន៖ មានឃុំថ្មី, កន្ទួត, ដារ, ថ្មអណ្តើក, បុស​លាវ, និងឃុំកោះច្រែង សរុបទាំងអស់មានចំនួន ១២៣ខ្នងផ្ទះ ដោយរងគ្រោះប៉ើងដំបូល និងរ​លំ​ផ្ទះ​។

ក្នុងនោះ គឺឃុំបុសលាវ និងឃុំកោះច្រែង រងផលប៉ះពាល់ធ្ងន់ធ្ងរជាងគេ របើកដំបូលចំនួន ៥៩​ខ្នង​ផ្ទះ ដោយឃុំបុសលាវ មានចំនួន ៣២ ខ្នងផ្ទះ និងឃុំកោះច្រែង មានចំនួន ២៧ខ្នងផ្ទះ។ ចំពោះ​ករណី​ខ្យល់​កន្ត្រាក់ខាងលើពុំបណ្តាលអោយគ្រោះថ្នាក់ដល់មនុស្សទេ៕ ដោយ សេង ម័រ