យោងតាមប្រភពយោធាដែលដកស្រង់ដោយប្រព័ន្ធផ្សព្វផ្សាយអ៊ីស្រាអែល កាលពីថ្ងៃអាទិត្យ (១៦ មីនា) បានឱ្យដឹងថា រដ្ឋាភិបាលអ៊ីស្រាអែល ត្រូវបានគេរំពឹងថានឹងអនុម័តប្រតិបត្តិការយោធាឡើងវិញនៅតំបន់ហ្កាហ្សា ប្រសិនបើពុំមានវឌ្ឍនភាពណាមួយកើតឡើងនៅក្នុងការចរចាកិច្ចព្រមព្រៀងស្តីពីចំណាប់ថ្នូរទេនោះ។

សេចក្តីរាយការណ៍បាននិយាយថា អង្គភាពចារកម្មយោធា Shin Bet ដែលជាទីភ្នាក់ងារសន្តិសុខផ្ទៃក្នុងរបស់អ៊ីស្រាអែល និងបញ្ជាការភាគខាងត្បូង បានពង្រីកបញ្ជីឈ្មោះ "គោលដៅរបស់ក្រុមហាម៉ាស" ដែលគេសង្ស័យ នៅទូទាំងតំបន់ហ្កាហ្សា ក្នុងអំឡុងពេលបទឈប់បាញ់។

ប្រភពលើកឡើងថា "គោលដៅជាច្រើន" ដែលត្រូវបានពង្រីកនេះ ត្រូវបានរៀបចំឡើងដើម្បីបើកឱ្យមានប្រតិបត្តិការយោធាឡើងវិញជាដំណាក់កាល ដើម្បីដាក់សម្ពាធលើថ្នាក់ដឹកនាំក្រុមហាម៉ាស ប្រសិនបើកិច្ចពិភាក្សាសម្រាប់ការដោះលែងចំណាប់ថ្នូរដួលរលំ។

ដំណឹងនេះកើតឡើងបន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃសៅរ៍សប្ដាហ៍មុន បានជួបជាមួយគណៈប្រតិភូដែលត្រឡប់ពីប្រទេសកាតាវិញ ដើម្បីពិភាក្សាតាមដានលើការចរចាបទឈប់បាញ់ហ្កាហ្សា។

ទន្ទឹមនឹងនេះ អ៊ីស្រាអែលនៅតែបន្តរារាំងជំនួយមនុស្សធម៌មិនឱ្យចូលទៅដែនដីហ្កាហ្សា រយៈពេល ១៥ថ្ងៃជាប់ៗគ្នាមកហើយ ដោយអះអាងថា វិធានការនេះមានគោលបំណងដាក់សម្ពាធក្រុមហាម៉ាស ឱ្យទទួលយកកិច្ចព្រមព្រៀងបទឈប់បាញ់ ដែលដាក់ស្នើដោយភាគីសហរដ្ឋអាមេរិក៕