នាយករដ្ឋមន្ត្រីអ៊ីរ៉ាក់លោក ម៉ូហាម៉េដ សៀ អាល់ស៊ូដានី (Mohammed Shia' al-Sudani) កាលពីថ្ងៃអាទិត្យ បានសង្កត់ធ្ងន់ថា ការបន្ធូរបន្ថយនិងកិច្ចសន្ទនា គឺជាផ្លូវដ៏មានប្រសិទ្ធភាពបំផុត ក្នុងការដោះស្រាយវិបត្តិនៅក្នុងតំបន់មួយ ដែលមានលក្ខណៈស្មុកស្មាញ និងសំខាន់ ដូចជាមជ្ឈិមបូព៌ាដែរនោះ។

លោកបានលើកឡើង ចំពេលមានភាពតានតឹងកើនឡើង បន្ទាប់ពីការវាយប្រហារដោយយោធារបស់សហរដ្ឋអាមេរិក ទៅលើក្រុមហ៊ួទី នៅប្រទេសយេម៉ែន។

ក្នុងអំឡុងពេលសន្ទនាតាមទូរស័ព្ទជាមួយរដ្ឋមន្ត្រីការពារជាតិអាមេរិក លោក Pete Hegseth លោក អាល់ស៊ូដានី បានសង្កត់ធ្ងន់ថា វិធីសាស្រ្តនេះ គឺជាជំហរជាប់លាប់របស់អ៊ីរ៉ាក់ ក្នុងការដោះស្រាយបញ្ហាប្រឈមក្នុងតំបន់ ដោយបញ្ជាក់ថា អ៊ីរ៉ាក់នឹងបន្តធ្វើសកម្មភាព ស្របតាមគោលការណ៍នេះ។ នេះបើយោងតាមសេចក្តីថ្លែងការណ៍របស់ការិយាល័យប្រព័ន្ធផ្សព្វផ្សាយរបស់លោក អាល់ស៊ូដានី។

សេចក្តីថ្លែងការណ៍ បានឲ្យដឹងថា សម្រាប់ផ្នែករបស់ខ្លួន លោក Hegseth បានពិនិត្យមើលការវិវឌ្ឍ ទាក់ទងនឹងប្រតិបត្តិការយោធា នៅក្នុងប្រទេសយេម៉ែន ដោយបញ្ជាក់ថា សហរដ្ឋអាមេរិក នឹងបន្តប្រតិបត្តិការរបស់ខ្លួន ប្រសិនបើក្រុមហ៊ួទី មិនបញ្ឈប់ការវាយប្រហាររបស់ខ្លួន ទៅលើកងកម្លាំងសហរដ្ឋអាមេរិក និងការរំខានដល់ការធ្វើនាវាចរណ៍ នៅសមុទ្រក្រហម។

សេចក្តីថ្លែងការណ៍បានបញ្ជាក់ថា ភាគីទាំងពីរ ក៏បានសង្កត់ធ្ងន់លើសារៈសំខាន់នៃការបន្តកិច្ចសហប្រតិបត្តិការសន្តិសុខ នៅក្នុងក្រុមចម្រុះអន្តរជាតិដែលដឹកនាំដោយសហរដ្ឋអាមេរិក ដើម្បីប្រយុទ្ធប្រឆាំងនឹងក្រុមជ្រុលនិយមរដ្ឋឥស្លាម (IS) ដោយបន្ថែមថា លោក អាល់ស៊ូដានី បានបញ្ចាក់ជាថ្មីនូវការប្តេជ្ញាចិត្តរបស់អ៊ីរ៉ាក់ ក្នុងការការពារទីប្រឹក្សារបស់ក្រុមចម្រុះអន្តរជាតិ។