​រុស្ស៊ី៖ ប្រទេស​រុស្ស៊ី​កាលពី​ថ្ងៃ​សុក្របាន​រិះគន់​សហរដ្ឋអាមេរិក​ចំពោះ​ការ​គំរាម​លើ​ប្រទេសអ៊ីរ៉ង់ ជាមួយ​នឹង​ការ​កើន​ឡើង​កាន់​តែ​ខ្លាំង​ផ្នែកការទូតនៅ​ទីភ្នាក់ងារ​ថាមពល​អា​តូ​មិ​ក​អន្តរជាតិ​ ក្នុង​ករណី​ដែល​ប្រទេស​អ៊ីរ៉ង់​មិនបាន​ធ្វើ​ឱ្យ​ប្រសើរ​ឡើងនូវ​កិច្ច​សហប្រតិបត្តិការ ជាមួយអង្គការ​ឃ្លាំមើល​នុយក្លេអ៊ែរ​របស់​អង្គការសហប្រជាជាតិ​។

ថ្លែង​នៅ​ក្នុង​សន្និសីទ​សារព័ត៌មាន​រួមជាមួយ​ឯកអគ្គរដ្ឋទូត​ចិន​លោក Wang Qun និង​ឯកអគ្គរដ្ឋទូត​រុស្ស៊ី​លោក Mikhail Ulyanov បាន​ចាត់ទុក​ការ​គំរាម​កំហែង​របស់សហរដ្ឋអាមេរិក​ ក្នុង​ការ​កោះ​ប្រជុំ​ក្រុមប្រឹក្សា​ទីភ្នាក់ងារ​ថាមពល​អា​តូ​មិ​ក​អន្តរជាតិ ដើម្បីដាក់ទណ្ឌកម្ម​លើប្រទេស​អ៊ីរ៉ង់​ថា "​គ្មាន​ប្រយោជន៍​" និង "​ប្រឆាំង​ផលិតភាព​"។ លោក Mikhail Ulyanov ឯកអគ្គរដ្ឋទូត​រុស្ស៊ី​និយាយ​ថា សម​ភាគី​អាមេរិករបស់​យើងបាត់បង់ការ​អត់​ធ្មត់​។ ប្រហែលជា​អាមេរិកមិនបាន​ទាក់ទង​ជាមួយ​ប្រទេស​អ៊ីរ៉ង់អស់​រយៈពេល​ជា​យូរ​មក​ហើយ ហើយ​ភ្លេច​ថា ​ប្រជាជន​អ៊ីរ៉ង់​មិន​ធ្វើ​អ្វី​ក្រោម​សម្ពាធ​នោះ​ទេ​។ ប្រសិនបើ​ពួកគេ​ស្ថិត​នៅ​ក្រោម​សម្ពាធនោះ​ពួកគេ​នឹង​ទប់ទល់​។ ជំនួស​មកវិញ លោក​បានជំរុញ​ឱ្យ​សហរដ្ឋអាមេរិក​គួរ​ចូលរួម​ក្នុង​ការចរចា​បែប​ពាណិជ្ជកម្ម​ ដោយ​គ្មាន​ការ​គំរាម​កំហែង​គ្នា​ទៅវិញទៅមក​។

ការចរចា​ដើម្បី​ស្ដារ​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ​២០១៥ គ្រោង​នឹង​ចាប់ផ្ដើម​ឡើងវិញ​នៅ​ថ្ងៃ​ចន្ទ ទី​២៩ ខែ​វិច្ឆិកា​ខាងមុខនេះ​។ កាលពី​ថ្ងៃ​ពុធ អគ្គនាយកទីភ្នាក់ងារ​ថាមពល​អា​តូ​មិ​ក​អន្តរជាតិ​ (IAEA) លោក Rafael Grossi បាន​សារ​ភាព​ថា ទីភ្នាក់ងារ​នេះ​មិន​អាច​ត្រួតពិនិត្យការផលិត​នៅ​មជ្ឈមណ្ឌល​កម្រិត​ខ្ពស់​នៅ​រោងចក្រ Karaj ប្រទេស​អ៊ីរ៉ង់​បានទេដោយសារ​វា​គ្មាន​កាមេរ៉ា និង​ឧបករណ៍​ត្រួត​ពិនិត្យ​ផ្សេងទៀត​ដែល​ត្រូវ​បាន​ដំឡើង​នៅ​ទីនោះ​។ ការ​បន្ត​បដិសេធ​របស់​សាធារណរដ្ឋ​ឥស្លាម​មួយ​នេះក្នុង​ការ​សហការ​ជាមួយ​ទីភ្នាក់ងារ បាន​ជំរុញឱ្យ​សហរដ្ឋអាមេរិក​ និង​សម្ព័ន្ធមិត្ត​អឺរ៉ុបគំរាម​ប្រទេសអ៊ីរ៉ង់​ ជាមួយ​នឹង​កិច្ចប្រជុំ​ក្រុមប្រឹក្សា​ពិសេស​មួយ​នៅមុន​ដំណាច់​ឆ្នាំ៕

អត្ថបទ៖ ប៊ុន ថន