រដ្ឋបាលរបស់លោកប្រធានាធិបតីអាមេរិក Donald Trump បាននិរទេសមនុស្សរាប់រយនាក់ ដែលត្រូវបានចោទប្រកាន់ថាជាសមាជិកក្រុមជនអន្ធពាលវេណេស៊ុយអេឡា ចេញពីសហរដ្ឋអាមេរិក បើទោះបីជាមានដីការបស់តុលាការហាមឃាត់មិនឱ្យធ្វើដូច្នេះក៏ដោយ ដោយរដ្ឋបាលអាមេរិកបាននិយាយនៅក្នុងសេចក្តីថ្លែងការណ៍មួយថា ចៅក្រមពុំមានសិទ្ធិអំណាចក្នុងការរារាំងសកម្មភាពនេះឡើយ។

ប្រតិបត្តិការនិរទេសនេះនៅតែត្រូវធ្វើឡើង បន្ទាប់ពីលោកចៅក្រម James Boasberg ចេញដីការារាំងការប្រើប្រាស់អំណាចសម័យសង្រ្គាមរបស់លោក Trump ដើម្បីនិរទេសមនុស្សជាង ២០០នាក់ដែលសង្ស័យថាជាសមាជិកក្រុមឧក្រិដ្ឋកម្មវេណេស៊ុយអេឡា Tren de Aragu ដែលជាប់ពាក់ព័ន្ធនឹងការចាប់ខ្លួន ការជំរិតទារប្រាក់ និងការស៊ីឈ្នួលសម្លាប់។

អ្នកនាំពាក្យសេតវិមាន បាននិយាយថា "ចៅក្រមតែមួយរូបមិនអាចហាមឃាត់យន្តហោះដែលដឹកភេរវករចេញពីទឹកដីអាមេរិកបានឡើយ" ដោយបន្ថែមថា តុលាការមិនមានមូលដ្ឋានច្បាប់បែបនេះទេ ហើយជាទូទៅ តុលាការសហព័ន្ធក៏មិនមានយុត្តាធិការលើកិច្ចការបរទេសរបស់ប្រធានាធិបតីនោះដែរ។

នៅពេលត្រូវសាកសួរថាតើរដ្ឋបាលបានបំពានលើដីការបស់តុលាការ ឬទេចំពោះការនិរទេសនោះ លោក Trump បានប្រាប់ថាឱ្យទៅសួរក្រុមមេធាវីលើរឿងនេះ។ លោក Trump បានបញ្ជាក់ថា ការប្រើប្រាស់ច្បាប់និរទេសគឺមានភាពយុត្តិធម៌ ដោយសារតែលោកមើលឃើញកំណើនជនអន្តោប្រវេសន៍ក្នុងប៉ុន្មានឆ្នាំថ្មីៗនេះ ស្រដៀងទៅនឹងសង្រ្គាមប្រឆាំងនឹងអាមេរិក៕