ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) បានបញ្ចេញនូវលទ្ធភាពបេសកកម្មដែលអាចត្រូវបាទទទួលខុសត្រូវដោយកម្លាំងគាំទ្រយោធាសម្រាប់អ៊ុយក្រែន ដែលទីក្រុងប៉ារីស និងទីក្រុងឡុងដ៍ កំពុងធ្វើការ ដើម្បីរួមគ្នាជាមួយប្រទេសដទៃទៀត ទៅលើអ្វីដែលហៅថា «ឆន្ទៈរួម» ដែលអាចដាក់ពង្រាយទាហាន បន្ទាប់ពីបទឈប់បាញ់ណាមួយជាមួយរុស្ស៊ី។

ថ្លែងទៅកាន់ប្រព័ន្ធផ្សព្វផ្សាយបារាំង នៅមុនកិច្ចប្រជុំកំពូលតាមអ៊ីនធឺណិត ដែលចក្រភពអង់គ្លេសធ្វើជាម្ចាស់ផ្ទះ កាលពីថ្ងៃសៅរ៍ លោក ម៉ាក្រុង បាននិយាយថា ផែនការរបស់បារាំង និងអង់គ្លេស មិនមានគោលបំណងដាក់ពង្រាយទាហាន «ដ៏ច្រើន» នៅក្នុងប្រទេសអ៊ុយក្រែនទេ ហើយជំនួសមកវិញដោយគិតគូរអំពីការដាក់ពង្រាយទាហាន នៅតាមទីតាំងសំខាន់ៗ។

ការិយាល័យរបស់លោក ម៉ាក្រុង បានឲ្យដឹងកាលពីថ្ងៃអាទិត្យថា ខ្លួនមិនអាចផ្តល់កំណត់ត្រានៃការពិភាក្សារបស់មេដឹកនាំបារាំង ជាមួយក្រុមអ្នកសារព័ត៌មាន មកពីកាសែតបារាំងក្នុងតំបន់ កាលពីយប់ថ្ងៃសុក្រនោះទេ។

ប៉ុន្តែយោងទៅតាមសារព័ត៌មាន La Dépêche du Midi និង Le Parisien លោកប្រធានាធិបតីបារាំង បាននិយាយអំពីប្រទេសដែលចូលរួមទាំងអស់ ដាក់ពង្រាយកងទ័ពជាច្រើនពាន់នាក់ ទៅកាន់ «ចំណុចសំខាន់ៗ» នៅអ៊ុយក្រែន។

របាយការណ៍ បានដកស្រង់សម្តីលោក ម៉ាក្រុង ដែលបាននិយាយថា បេសកកម្មរបស់ពួកគេ អាចរួមបញ្ចូលការផ្តល់ការបណ្តុះបណ្តាល និងការគាំទ្រដល់ការការពាររបស់អ៊ុយក្រែន ដើម្បីបង្ហាញពីការគាំទ្រ   រយៈពេលវែងសម្រាប់ទីក្រុងគីវ។