នៅក្នុងបទសម្ភាសន៍ជាផតឃែស្ថមួយ នាយករដ្ឋមន្ត្រីឥណ្ឌា លោក Narendra Modi បានប្រាប់ថា ប្រធានាធិបតីអាមេរិក លោក Donald Trump «បានត្រៀមលក្ខណៈបន្ថែមទៀតច្រើនជាងមុន» សម្រាប់អាណត្តិទី២ របស់លោក ហើយបានរៀបចំនូវផែនទីបង្ហាញផ្លូវដ៏ច្បាស់លាស់មួយ ដោយការលើកឡើងកើតមានមួយសប្តាហ៍ មុនការដំឡើងពន្ធបដិការ (ពន្ធតបតទៅវិញទៅមក) ដែលត្រូវបានគ្រោងទុកដោយទីក្រុងវ៉ាស៊ីនតោន។

គួរបញ្ជាក់ថា ប្រទេសឥណ្ឌា គឺស្ថិតក្នុងចំណោមដៃគូពាណិជ្ជកម្មដែលត្រូវប្រឈមមុខនឹងកម្រិតពន្ធថ្មីរបស់សហរដ្ឋអាមេរិក ចាប់ពីខែមេសាតទៅ ដែលគំរាមកំហែងបង្កជាផលវិបាកដល់អ្នកនាំចេញរបស់ខ្លួន ក្នុងឧស្សាហកម្មជាច្រើន រាប់ចាប់ពីរថយន្ត រហូតដល់កសិកម្ម។

ប៉ុន្តែបន្ទាប់ពីលោក Modi និងលោក Trump បានជួបប្រជុំគ្នា កាលពីខែកុម្ភៈ ប្រទេសទាំង២ បានព្រមព្រៀងគ្នាដោះស្រាយបញ្ហាពន្ធនេះ និងធ្វើការលើផ្នែកដំបូងនៃកិច្ចព្រមព្រៀងមួយ នារដូវស្លឹកឈើជ្រុះឆ្នាំ ២០២៥ ដោយមានបំណងឈានដល់ពាណិជ្ជកម្មទ្វេភាគីចំនួន ៥០០០ពាន់លានដុល្លារ នៅឆ្នាំ២០៣០។

នៅក្នុងកម្មវិធីផតឃែស្ថជាមួយអ្នកវិទ្យាសាស្ត្រកុំព្យូទ័រជនជាតិអាមេរិក និងជាអ្នកផលិតផតឃែស្ថ លោក Lex Fridman ដែលបានចេញផ្សាយកាលពីថ្ងៃអាទិត្យ (ទី១៦ ខែមីនា) ដោយសំដៅទៅលើអាណត្តិទី២ របស់លោក Trump ដែលបានចាប់ផ្តើមនៅក្នុងខែមករា លោក Modi បាននិយាយថា៖ «លើកនេះ គាត់(លោក Trump) ហាក់ដូចជាត្រៀមខ្លួនបានច្រើនជាងមុន»។ លោកបានបន្ថែមថា៖ «គាត់មានផែនទីបង្ហាញផ្លូវយ៉ាងច្បាស់លាស់ នៅក្នុងគំនិត ដោយកំណត់ជំហានយ៉ាងច្បាស់លាស់។ រាល់ការបោះជំហានទៅមុខ ត្រូវបានរៀបចំឡើង ដើម្បីឲ្យគាត់ឈានឆ្ពោះទៅរកគោលដៅរបស់គាត់»។

លោក Modi បានសរសើរលោក Trump ចំពោះភាពសប្បុរស និងភាពរាបសាររបស់លោក ដែលបញ្ជាក់ពីទំនាក់ទំនងដ៏រឹងមាំ រវាងមេដឹកនាំទាំង២។ លោក Modi បាននិយាយថា៖ «ការឆ្លុះបញ្ចាំងរបស់គាត់ (លោក Trump) បានបង្ហាញពីស្មារតី America First (អាមេរិកទី១) ពោលគឺមិនខុសពីខ្ញុំជឿជាក់លើប្រទេសរបស់ខ្ញុំជាអាទិភាពនោះដែរ។ ខ្ញុំឈរខាងប្រទេសឥណ្ឌាមុនរឿងអ្វីទាំងអស់ ហើយនោះហើយជាមូលហេតុដែលយើងមានទំនាក់ទំនងយ៉ាងល្អជាមួយគ្នា»៕