ក្រុមប្រដាប់អាវុធគាំទ្រដោយប្រទេសរ៉្វាន់ដា គឺ M23 កាលពីថ្ងៃអាទិត្យ (ទី១៦ ខែមីនា) បានចោទប្រកាន់រដ្ឋាភិបាលរបស់សាធារណរដ្ឋប្រជាធិបតេយ្យកុងហ្គោដែលខ្លួនកំពុងប្រយុទ្ធជាមួយនៅភាគខាងកើតប្រទេស ពីការប៉ុនប៉ង «បំផ្លាញ» កិច្ចពិភាក្សាដោយផ្ទាល់ដែលត្រូវបានគ្រោងទុកធ្វើឡើងនៅប្រទេសអង់ហ្គោឡា។

អ្នកនាំពាក្យរបស់ក្រុម M23 និងសម្ព័ន្ធទន្លេកុងហ្គោ (AFC) ជាសម្ព័ន្ធភាពនយោបាយ-យោធា ដែលក្រុម M23 ជាសមាជិក បានចោទប្រកាន់រដ្ឋាភិបាលកុងហ្គោថា បានប្រើប្រាស់យន្តហោះចម្បាំង និងយានដ្រូន ដើម្បីទម្លាក់គ្រាប់បែកលើតំបន់ដែលមានប្រជាជនរស់នៅច្រើន ក្នុងប៉ុន្មានថ្ងៃថ្មីៗនេះ។

តាមរយៈសារដែលត្រូវបានបង្ហោះនៅបណ្ដាញសង្គម X លោក Lawrence Kanyuka បានឲ្យដឹងថា៖ «ការបង្កើននូវភាពតានតឹងដ៏អាក្រក់នេះ បង្ហាញពីចេតនារបស់របបទីក្រុង Kinshasa ដែលចង់បំផ្លាញកិច្ចសន្ទនាដែលទន្ទឹងរង់ចាំជាយូរមកហើយ»។

យ៉ាងណាក្ដី សារព័ត៌មាន AFP មិនអាចផ្ទៀងផ្ទាត់បាននោះឡើយ ពាក់ព័ន្ធនឹងការចោទប្រកាន់ដែលធ្វើឡើងដោយក្រុម M23 នេះ ហើយរដ្ឋាភិបាលកុងហ្គោ ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ។ នៅក្នុងសេចក្តីថ្លែងការណ៍របស់លោក លោក Kanyuka «ទទួលស្គាល់ពីការទទួលបាន» នូវការអញ្ជើញរបស់អង់ហ្គោឡា ដើម្បីឲ្យមាន «ការសន្ទនាដោយផ្ទាល់» ដែលគ្រោងធ្វើនៅថ្ងៃអង្គារ នៅទីក្រុង Luanda ជាមួយរដ្ឋាភិបាលកុងហ្គោ។

គួរបញ្ជាក់ថា រហូតមកដល់ពេលនេះ ប្រធានាធិបតីកុងហ្គោ លោក Felix Tshisekedi បានបដិសេធមិនចូលរួមកិច្ចពិភាក្សាជាមួយក្រុម M23 ដែល ដោយមានគាំទ្រដោយកងទ័ពរ៉្វាន់ដា បានដណ្ដើមកាន់កាប់យ៉ាងលឿន នៅភាគខាងកើតកុងហ្គោ ចាប់តាំងពីដើមឆ្នាំមក៕