រុស្ស៊ី៖ ពលរដ្ឋនៅទីក្រុងម៉ូស្គូបាននាំយកផ្កាទៅកន្លែងគោរពវិញ្ញាណក្ខន្ធ ដើម្បីរំលឹកដល់កម្មករអណ្ដូងរ៉ែដែលបានស្លាប់ក្នុងអំឡុងពេលការផ្ទុះឧស្ម័នមេតាន នៅក្នុងអណ្តូងរ៉ែធ្យូងថ្មក្នុងតំបន់ Kemerovo។ អាជ្ញាធររុស្ស៊ីកាលពីថ្ងៃសុក្របានបង្ហាញឈ្មោះជនរងគ្រោះ ៥១នាក់ដែលត្រូវបានគេសន្មត់ថាបានស្លាប់បន្ទាប់ពីការផ្ទុះអណ្តូងរ៉ែនៅតំបន់ Siberia ដែលត្រូវបានគេជឿថា ជាចំនួនមនុស្សស្លាប់ច្រើនបំផុតចាប់តាំងពីឆ្នាំ២០១០ មក។
បញ្ជីឈ្មោះកម្មករអណ្តូងរ៉ែ ៤៦នាក់ និងក្រុមអ្នកជួយសង្គ្រោះ ៥នាក់ត្រូវបានផ្សព្វផ្សាយតាមអ៊ីនធឺណិតដោយរដ្ឋាភិបាលតំបន់ Kemerovo នៅភាគនិរតីតំបន់ Siberia ជាកន្លែងដែលអណ្តូងរ៉ែស្ថិតនៅទីនោះ។ ដំបូងឡើយអាជ្ញាធរបានរាយការណ៍ពីការស្លាប់ដែលអាចកើតមានដល់ចំនួន ៥២នាក់ ប៉ុន្តែក្រុមរុករកកាលពីថ្ងៃសុក្របានរកឃើញអ្នកនៅរស់រានមានជីវិតម្នាក់ ជាអ្វីដែលមន្ត្រីបានពិពណ៌នាថាជាអព្ភូតហេតុ។ កម្មកររុករករ៉ែសរុប ២៨៥នាក់នៅក្នុងអណ្តូងរ៉ែ Listvyazhnaya នៅពេលមានការផ្ទុះកាលពីថ្ងៃព្រហស្បតិ៍ ដែលបានបញ្ចេញផ្សែងពុលពេញអណ្តូងរ៉ែយ៉ាងឆាប់រហ័ស។ កម្មករ ២៣៩នាក់ត្រូវបានជួយសង្គ្រោះភ្លាមៗបន្ទាប់ពីការបំផ្ទុះ ហើយជាង ៦០នាក់បានស្វែងរកជំនួយផ្នែកវេជ្ជសាស្ដ្រ ខណៈរងរបួស។
នៅទីក្រុងម៉ូស្គូ កាលពីយប់ថ្ងៃសុក្រមនុស្សជាច្រើនបានមកជួបជុំគ្នា នៅក្នុងពិធីរំលឹកមួយខាងក្រៅការិយាល័យតំណាងតំបន់ Kemerovo ដោយដាក់ផ្កា និងក្រដាសប្រាក់។ នេះជាសោកនាដកម្មដ៏ធំមិនត្រឹមតែសម្រាប់តំបន់មួយប៉ុណ្ណោះទេ ប៉ុន្តែសម្រាប់ប្រទេសទាំងមូល។ វាជាឧបទ្ទវហេតុអណ្តូងរ៉ែដែលមានមនុស្សស្លាប់ច្រើនបំផុត នៅក្នុងប្រទេសរុស្ស៊ីចាប់តាំងពីឆ្នាំ២០១០ នៅពេលដែលការផ្ទុះឧស្ម័នមេតានចំនួនពីរលើក និងអគ្គិភ័យបណ្តាលឲ្យមនុស្ស ៩១នាក់ស្លាប់នៅអណ្តូងរ៉ែ Raspadskaya ក្នុងតំបន់ Kemerovo ដូចគ្នានេះ៕
អត្ថបទ៖ ប៊ុន ថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
