នាយករដ្ឋមន្ត្រីថៃ លោកស្រី Paetongtarn Shinawatra (ផែថងថាន ស៊ីណាវ៉ាត់) នៅថ្ងៃចន្ទ (ទី១៧ ខែមីនា) បានអំពាវនាវឲ្យមានចំណាត់ការផ្លូវច្បាប់ បន្ទាប់ពីមនុស្ស ៦នាក់ បានបាត់បង់ជីវិត កាលពីចុងសប្តាហ៍កន្លងមក នៅទីកន្លែងគម្រោងសាងសង់ផ្លូវហាយវេ ដែលបានឃើញមានឧបទ្ទវហេតុបណ្ដាលឲ្យមានអ្នកស្លាប់ជាញឹកញាប់ ក្នុងប៉ុន្មានឆ្នាំថ្មីៗនេះ។

កាលពីព្រឹកព្រលឹមថ្ងៃទី១៥ ខែមីនា ធ្នឹមបេតុងនៅការដ្ឋានសាងសង់ បានបាក់រលំនៅលើផ្លូវ Rama II ជាផ្លូវហាយវេដ៏សំខាន់ដែលតភ្ជាប់ទីក្រុងបាងកកទៅកាន់ភាគខាងត្បូងរបស់ប្រទេស។

លោកស្រី ផែថងថាន បានដឹកនាំកិច្ចប្រជុំបន្ទាន់មួយជាមួយភ្នាក់ងាររដ្ឋាភិបាល នៅថ្ងៃទី១៧ ខែមីនានេះ ដើម្បីពិភាក្សាអំពីសុវត្ថិភាព បន្ទាប់ពីមានឧបទ្ទវហេតុដែលបានបណ្តាលឲ្យមនុស្សរាប់សិបនាក់រងរបួសផងដែរ។ លោកស្រីបានប្រាប់ថា អ្នកម៉ៅការអាចត្រូវបានដកហូតអាជ្ញាប័ណ្ណរបស់ពួកគេ ប្រសិនបើត្រូវបានរកឃើញថា មានការធ្វេសប្រហែស ហើយការចោទប្រកាន់ព្រហ្មទណ្ឌ អាចកើតមានបន្ទាប់ពីនោះ។

អំឡុងកិច្ចប្រជុំនោះ លោកស្រីបាននិយាយថា៖ «យើងនឹងពិនិត្យមើលថា តើដំណើរការណាមួយ ត្រូវបានគេមិនអើពើដែរ ឬទេ ហើយថា តើការងារសាងសង់បានអនុវត្តតាមច្បាប់ និងបទប្បញ្ញត្តិដែរ ឬអត់។ ប្រហែលជាអាចមានការទទួលខុសត្រូវផ្នែកព្រហ្មទណ្ឌ»។

គួររំលឹកដែរថា ការដាច់ធ្លាក់ដងស្ទូច កាលពីខែវិច្ឆិកា ឆ្នាំ២០២៤ បានបណ្ដាលកម្មករយ៉ាងហោចណាស់ ៣នាក់ ស្លាប់ ខណៈដែលសារព័ត៌មានបាងកកប៉ុស្តិ៍ បានរាយការណ៍ថា មានឧបទ្ទវហេតុបណ្ដាលឲ្យមានអ្នកស្លាប់ ២លើកបន្ថែមទៀត គឺនៅក្នុងខែឧសភា ឆ្នាំ២០២៣ និងខែមករា ឆ្នាំ២០២៤៕