កាលពីចុងសប្តាហ៍កន្លងមក អ្នកសារព័ត៌មាន និងបុគ្គលិកផ្សេងទៀតរាប់រយនាក់ ដែលធ្វើការនៅវិទ្យុសំឡេងសហរដ្ឋអាមេរិក វិទ្យុអាស៊ីសេរី វិទ្យុអឺរ៉ុបសេរី និងបណ្តាញផ្សព្វផ្សាយផ្សេងទៀត បានទទួលអ៊ីម៉ែល ដែលប្រាប់ជាព័ត៌មានថា ពួកគេនឹងត្រូវបានរារាំងមិនឲ្យចូលការិយាល័យធ្វើការ ហើយគួរតែប្រគល់ប័ណ្ណអនុញ្ញាតសារព័ត៌មាន ទូរសព្ទ និងឧបករណ៍ផ្សេងទៀតដែលត្រូវបានផ្ដល់ឲ្យដោយការិយាល័យ ។

សូមបញ្ជាក់ថា លោក Trump ដែលបានកាត់បន្ថយទីភ្នាក់ងារជំនួយអាមេរិក និងក្រសួងអប់រំរួចហើយ កាលពីថ្ងៃសុក្រចុងសប្ដាហ៍កន្លងមក បានចេញក្រឹត្យមួយដែលបានចុះបញ្ជីទីភ្នាក់ងារសហរដ្ឋអាមេរិក សម្រាប់ប្រព័ន្ធផ្សព្វផ្សាយសកលថា ស្ថិតក្នុងចំណោម «សមាសភាពនៃការិយាធិបតេយ្យសហព័ន្ធ ដែលប្រធានាធិបតីបានកំណត់ថា មិនចាំបាច់»។

លោកស្រី Kari Lake អ្នកគាំទ្រដ៏លេចធ្លោ ចំពោះលោក Trump និងជាអតីតអ្នកសារព័ត៌មាន នៅរដ្ឋ Arizona ដែលត្រូវបានឲ្យទទួលខុសត្រូវលើទីភ្នាក់ងារសារព័ត៌មាន បានសរសេរនៅក្នុងអ៊ីម៉ែលផ្ញើទៅកាន់ប្រព័ន្ធផ្សព្វផ្សាយនានាដែលលោកស្រីត្រួតពិនិត្យថា ប្រាក់ជំនួយរបស់សហព័ន្ធ «លែងផ្ដល់ជូនជាអាទិភាពទៀតហើយ»។

មន្ត្រីសារព័ត៌មានសេតវិមានម្នាក់ ឈ្មោះ Harrison Fields បានបញ្ចេញសារតាមរយៈការបង្ហោះលើបណ្ដាញសង្គម X ដោយសរសេរថា «លាហើយ» ការផ្សាយសំឡេងជា ២០ភាសា ដែលទំនងជាការសំដៅទៅដល់ការផ្សាយពហុភាសារបស់វិទ្យុសំឡេងសហរដ្ឋអាមេរិក៕