បេក្ខជនប្រកាន់ស្តាំដ៏តឹងរ៉ឹង ឬស្ដាំនិយមជ្រុល ត្រូវបានគេមើលឃើញថា កំពុងនាំមុខគេក្នុងជុំទី១ នៃការបោះឆ្នោតឡើងវិញជ្រើសរើសប្រធានាធិបតីរូម៉ានី ក្នុងខែឧសភាខាងមុខនេះ។ នេះបើយោងតាមការស្ទង់មតិ ដែលចេញផ្សាយនៅថ្ងៃចន្ទ (ទី១៧ ខែមីនា) នេះ អំពីការបោះឆ្នោតដែលនឹងកំណត់ថា តើទីក្រុង Bucharest បន្តរក្សានិន្នាការគាំទ្រអឺរ៉ុប ក្នុងរយៈពេលប៉ុន្មានឆ្នាំថ្មីៗនេះដែរ ឬទេ។

តែទោះបីជាយ៉ាងណាក្ដី ការស្ទង់មតិដោយសា្ថប័ន AtlasIntel ក៏បានបង្ហាញផងដែរថា បេក្ខជនកណ្ដាលនិយម គឺអភិបាលក្រុង Bucharest លោក Nicusor Dan ទំនងជានឹងយកឈ្នះបេក្ខជនស្តាំនិយមជ្រុលទាំង ២រូប មិនថា រូបណាក៏ដោយដែលឆ្លងចូលទៅក្នុងការប្រជែងការបោះឆ្នោត នៅក្នុងជុំទី២ និងជាជុំផ្ដាច់ព្រ័ត្រ។

សូមបញ្ជាក់ថា រ៉ូម៉ានី ដែលជាប្រទេសសមាជិកអង្គការណាតូ និងសហភាពអឺរ៉ុប (EU) គ្រោងនឹងធ្វើការបោះឆ្នោតប្រធានាធិបតីចំនួន ២ជុំរបស់ខ្លួនឡើងវិញ នៅថ្ងៃទី៤ និងទី១៨ ខែឧសភា បន្ទាប់ពីតុលាការកំពូល បានលុបចោលលទ្ធផលបោះឆ្នោតដើម កាលពីខែធ្នូឆ្នាំមុន ចំពេលមានការចោទប្រកាន់ថា មានការជ្រៀតជ្រែកពីរុស្ស៊ី ដើម្បីជួយដល់បេក្ខជនស្តាំនិយមជ្រុល លោក Calin Georgescu ដែលបាននាំមុខនៅក្នុងការស្ទង់មតិ។ ទីក្រុងមូស្គូបានបដិសេធមិនមានការជ្រៀតជ្រែកណាមួយ ក្នុងការបោះឆ្នោតនោះ។

បន្ទាប់ពីបេក្ខភាពរបស់លោក Georgescu សម្រាប់ការឈរឈ្មោះប្រកួតប្រជែងឡើងវិញ ត្រូវបានរារាំងដោយតុលាការកំពូល ទាំងលោក George Simion និងលោកស្រី Anamaria Gavrila ដែលជាឥស្សរជនលេចធ្លោខាងក្រុមប្រកាន់ស្ដាំយ៉ាងតឹងរ៉ឹងរបស់រូម៉ានី បានបោះជំហានចូលមកឈរឈ្មោះ ដោយមានកិច្ចព្រមព្រៀងគ្នាថា នឹងមានមា្នក់ដកខ្លួនចេញ ប្រសិនបើបេក្ខភាពទាំង២ ត្រូវបានអនុម័ត។ ឥឡូវនេះ ការិយាល័យបោះឆ្នោតកណ្តាល (CEB) បានទទួលយកបេក្ខភាពទាំង ២រូបហើយ ប៉ុន្តែនៅមិនទាន់មានការសម្រេចថា តើអ្នកណានឹងចាកចេញពីការឈរឈ្មោះនេះ។

ការស្ទង់មតិរបស់សា្ថប័ន AtlasIntel ដែលធ្វើឡើងចាប់ពីថ្ងៃទី១៣ ដល់ថ្ងៃទី១៥ ខែមីនា ហើយបានចេញផ្សាយនៅថ្ងៃចន្ទនេះ លើគេហទំព័រព័ត៌មាន hotnews.ro បានបង្ហាញថា ទាំងលោក Simion ឬលោកស្រី Gavrila នឹងទទួលបានសំឡេងឆ្នោតភាគច្រើន នៅជុំទី១។ យោងតាមការស្ទង់មតិ បានឲ្យដឹងថា លោក Simion នឹងទទួលបាន ៣០ភាគរយនៃការបោះឆ្នោត នៅជុំទី១ ប្រសិនបើលោកជាបេក្ខជនរបស់ក្រុមស្តាំនិយមជ្រុល ខណៈលោកស្រី Gavrila នឹងទទួលបានសំឡេងគាំទ្រ ៣០,២ភាគរយ ប្រសិនបើលោកស្រីឈរឈ្មោះប្រកួតប្រជែង៕