កងទ័ពស៊ីរីបានបាញ់តគ្នាជាមួយទាហាន និងក្រុមប្រដាប់អាវុធលីបង់ នៅភាគឦសានប្រទេសលីបង់ ពេញមួយយប់ថ្ងៃអាទិត្យ (ទី១៦ ខែមីនា) និងឆ្លងចូលថ្ងៃចន្ទ ដែលជាការប៉ះទង្គិចគ្នាថ្មី នៅតាមព្រំដែននៃប្រទេសទាំង២។

ភាពតានតឹង នៅតាមបណ្ដោយព្រំដែនតំបន់ភ្នំនេះ មានកម្រិតកាន់តែខ្ពស់ឡើងៗ ក្នុងរយៈពេលប៉ុន្មានខែនេះ ចាប់តាំងពីក្រុមឧទ្ទាមឥស្លាម បានផ្តួលរំលំរបបរបស់លោក Bashar al-Assad នៅប្រទេសស៊ីរី ដែលជាសម្ព័ន្ធមិត្តរបស់ទីក្រុងតេអេរ៉ង់ និងក្រុមប្រដាប់អាវុធលីបង់គាំទ្រដោយអ៊ីរ៉ង់ គឺហេសបូឡា ហើយរដ្ឋាភិបាលអន្តរកាលសេរី បានបង្កើតស្ថាប័ន និងកងទ័ពរបស់ខ្លួនដោយផ្ទាល់។

កាលពីល្ងាចថ្ងៃអាទិត្យ ក្រសួងការពារជាតិស៊ីរី បានចោទប្រកាន់ក្រុមហេសបូឡាថា បានឆ្លងចូលទៅក្នុងដែនដីរបស់ស៊ីរី ហើយបានចាប់ពង្រត់ និងសម្លាប់សមាជិក ៣នាក់នៃកងទ័ពថ្មីរបស់ប្រទេសស៊ីរី។ តែក្រុមហេសបូឡាបានបដិសេធពីការជាប់ពាក់ព័ន្ធណាមួយ។ ប្រភពសន្តិសុខលីបង់ បានប្រាប់សារព័ត៌មាន Reuters ថា ទាហានស៊ីរី ៣នាក់ បានឆ្លងចូលទៅក្នុងដែនដីលីបង់ ហើយត្រូវបានសម្លាប់ដោយសមាជិកនៃក្រុមប្រដាប់អាវុធរបស់កុលសម្ព័ន្ធមួយ នៅភាគឦសានលីបង់ ដោយសារពួកគេខ្លាចថា ទីក្រុងរបស់ខ្លួន ស្ថិតនៅក្រោមការវាយប្រហារ។

បើយោងតាមក្រសួងការពារជាតិស៊ីរី និងកងទ័ពលីបង់ បានឲ្យដឹងថា ជាការសងសឹក ចំពោះការស្លាប់របស់ទាហានខ្លួននោះ ទាហានស៊ីរីបានបាញ់ផ្លោងដាក់ទីក្រុងព្រំដែនរបស់លីបង់ពេញមួយយប់។ អ្នកស្រុកនៃទីក្រុង Al-Qasr ដែលមានចម្ងាយមិនដល់ ១គីឡូម៉ែត្រពីព្រំដែន បានប្រាប់សារព័ត៌មាន Reuters ថា ពួកគេបានភៀសខ្លួនចេញពីដែនដីគោកបន្ថែមទៀត ដើម្បីគេចពីការទម្លាក់គ្រាប់បែក។

នាថ្ងៃចន្ទនេះ កងទ័ពលីបង់ បានឲ្យដឹងនៅក្នុងសេចក្តីថ្លែងការណ៍មួយថា ខ្លួនបានប្រគល់សពប្រជាជនស៊ីរី ៣នាក់ដែលត្រូវបានសម្លាប់នោះ ទៅឲ្យអាជ្ញាធរស៊ីរី ហើយថា ខ្លួនបានឆ្លើយតបវិញដោយការបាញ់ប្រហារចេញពីដែនដីស៊ីរី និងបានបញ្ជូនកងកម្លាំងបន្ថែមទៅកាន់តំបន់ព្រំដែន៕