លោកប្រធានាធិបតីអាមេរិក Donald Trump បាននិយាយនៅថ្ងៃចន្ទ ទី១៧ ខែមីនាថាលោកនឹងអូសអ៊ីរ៉ង់ឲ្យចេញមុខទទួលខុសត្រូវចំពោះការវាយប្រហារណាមួយធ្វើឡើងដោយក្រុមចលនាហ៊ួទីដែលប្រទេសនេះបានគាំទ្រក្នុងប្រទេសយេម៉ែន ខណៈរដ្ឋបាលរបស់លោកបានពង្រីកប្រតិបត្តិការយោធាដ៏ធំបំផុតរបស់សហរដ្ឋអាមេរិកនៅមជ្ឈិមបូព៌ា ចាប់តាំងពីលោកវិលត្រឡប់ទៅកាន់សេតវិមាន។

ឆ្លើយតបទៅនឹងការគំរាមកំហែងរបស់ចលនាហ៊ួទីចំពោះការដឹកជញ្ជូនអន្តរជាតិ សហរដ្ឋអាមេរិកបានចាប់ផ្តើមការវាយប្រហារតាមអាកាសថ្មីមួយកាលពីថ្ងៃសៅរ៍ចុងសប្ដាហ៍មុន។ទូរទស្សន៍Al Masirah គ្រប់គ្រងដោយក្រុមហ៊ួទីនិយាយថាកាលពីថ្ងៃចន្ទទីក្រុងកំពង់ផែសមុទ្រក្រហម Hodeidahនិងតំបន់Al Jawf ភាគខាងជើងនៃរដ្ឋធានីសាណា(Sanaa)ត្រូវបានកំណត់គោលដៅ។

លោក Trump បាននិយាយនៅលើវេទិកាសង្គម Truth Social របស់លោកថារាល់ការបាញ់ប្រហារដោយក្រុមហ៊ួទី នឹងត្រូវបានមើលពីចំណុចនេះទៅ ជាការបាញ់ចេញពីអាវុធ និងការដឹកនាំរបស់អ៊ីរ៉ង់ ហើយអ៊ីរ៉ង់ នឹងត្រូវទទួលខុសត្រូវ និងទទួលរងផលវិបាក ហើយផលវិបាកទាំងនោះនឹងធ្ងន់ធ្ងរ។

សេតវិមានបាននិយាយថា សាររបស់លោក Trump ទៅកាន់ប្រទេសអ៊ីរ៉ង់ គឺដើម្បីបញ្ជាក់ពីភាពម៉ឺងម៉ាត់របស់សហរដ្ឋអាមេរិក។

អ្នកនាំពាក្យមន្ទីរបញ្ចកោណលោក សង់ ផាណេល (Sean Parnell) បាននិយាយថា ខ្លួនបានវាយប្រហារជាង ៣០ កន្លែងរហូតមកដល់ពេលនេះ ហើយនឹងប្រើប្រាស់កម្លាំងដ៍ច្រើនលើសលប់ប្រឆាំង ក្រុមហ៊ួទី លុះត្រាក្រុមនេះបញ្ឈប់ការវាយប្រហារលើនាវាទំនិញនៅសមុទ្រក្រហម ហើយនឹងមិនផ្លាស់ប្ដូរគោលដៅទេ។

ក្រសួងសុខាភិបាលគ្រប់គ្រងដោយក្រុមហ៊ួទី បាននិយាយកាលពីថ្ងៃអាទិត្យថាមនុស្ស៥៣ នាក់បានស្លាប់ក្នុងការវាយប្រហារនេះ។ កុមារ៥នាក់ និងស្ត្រី២នាក់ស្ថិតក្នុងចំណោមជនរងគ្រោះ ហើយ៩៨នាក់បានរងរបួស ។ សារព័ត៌មាន Reuters ពុំអាចផ្ទៀងផ្ទាត់ដោយឯករាជ្យពីចំនួនអ្នកស្លាប់ ទាំងនោះបានទេ៕