នាយករដ្ឋមន្ត្រីកាណាដា លោក Mark Carney កាលពីថ្ងៃចន្ទ ១៧មីនា បានព្រមានប្រទេសរបស់លោកត្រូវតែកាត់បន្ថយការពឹងផ្អែករបស់ខ្លួនលើសហរដ្ឋអាមេរិក ហើយនឹងងាកទៅរកសម្ព័ន្ធមិត្តអឺរ៉ុបគួរឱ្យទុកចិត្តវិញ ក្នុងអំឡុងដំណើរលើកដំបូងរបស់លោក នៅបរទេសជាលើកដំបូង។

អំឡុងដំណើរទស្សនកិច្ចនោះ លោក Carney បានជួបមេដឹកនាំអង់គ្លេសលោក Keir Starmer និងលោក Emmanuel Macron ប្រធានាធិបតីបារាំង។ ជំនួបនោះបានកើតឡើងបន្ទាប់ពីប្រធានាធិបតីអាមេរិកលោក Donald Trump លើកឡើងថាប្រទេសរបស់លោក អាចក្លាយជាផ្នែកមួយនៃសហរដ្ឋអាមេរិក និងគំរាមដល់សេដ្ឋកិច្ចរបស់កាណាដា។

បន្ទាប់ពីបានស្នងតំណែងបន្តពីលោក Justin Trudeau កាលពីសប្តាហ៍មុន លោក Carney បានជ្រើសរើសប្រទេសមហាអំណាចអឺរ៉ុបសំខាន់ៗ គឺ បារាំង និងចក្រភពអង់គ្លេស ជាជាងសហរដ្ឋអាមេរិកសម្រាប់ដំណើរទស្សនកិច្ចនេះ។

ដំណើររបស់លោក Carney ជាការផ្ញើសារទៅកាន់លោក Trump អំឡុងមានជម្លោះពន្ធដ៏តានតឹង។

បន្ទាប់ពីកិច្ចពិភាក្សាជាមួយនាយករដ្ឋមន្ត្រីអង់គ្លេស នៅទីក្រុងឡុងដ៍ លោក Carney បានប្រាប់អ្នកសារព័ត៌មានថា កាណាដា ត្រូវតែធ្វើពិពិធកម្ម ឬពង្រីកទំនាក់ទំនងពាណិជ្ជកម្ម និងសន្តិសុខរបស់ខ្លួន។

នោះហើយជាហេតុផលមួយសម្រាប់ដំណើរទស្សនកិច្ចលើកដំបូងរបស់លោក ទៅកាន់ទីក្រុងប៉ារីស និងទីក្រុងឡុងដ៍៕