បទឈប់បាញ់ដ៏ផុយស្រួយក្នុងដែនដីហ្កាហ្សា បានរលាយនៅព្រឹកថ្ងៃអង្គារសប្ដាហ៍នេះ ខណៈអ៊ីស្រាអែលបានបើកវាយប្រហារដ៏ខ្លាំងក្លានៅទូទាំងតំបន់នេះ ហើយនាយករដ្ឋមន្ត្រីអ៊ីស្រាអែលលោក Benjamin Netanyahu បានប្តេជ្ញាបង្កើនកម្លាំងយោធាកម្ទេចក្រុមហាម៉ាស។

នៅក្នុងសេចក្តីថ្លែងការណ៍មួយ កងកម្លាំងការពារអ៊ីស្រាអែល និងទីភ្នាក់ងារសន្តិសុខអ៊ីស្រាអែលបាននិយាយនៅព្រឹកថ្ងៃអង្គារនេះ ថា ពួកគេកំពុងវាយប្រហារយ៉ាងសន្ធាប់លើគោលដៅរបស់ក្រុមហាម៉ាសនៅក្នុងតំបន់ហ្កាហ្សា។

រដ្ឋមន្ត្រីការពារជាតិអ៊ីស្រាអែលលោក Katz បាននិយាយនៅក្នុងសេចក្តីថ្លែងការណ៍មួយថាយប់នេះ យើងបានវិលត្រលប់ទៅរកការប្រយុទ្ធឡើងវិញនៅក្នុងទឹកដីហ្កាហ្សា ។

អ៊ីស្រាអែល បានបើកការវាយប្រហារនៅទូទាំងតំបន់ហ្កាហ្សាស្ទ្រីបនៅយប់ថ្ងៃអង្គារនេះ សម្លាប់មនុស្សជាង១០០នាក់។

នៅក្នុងសេចក្តីថ្លែងការណ៍ដាច់ដោយឡែកមួយ ក្រុមហាម៉ាសបានប្រកាសថា លោក Netanyahu និងរដ្ឋាភិបាលជ្រុលនិយមរបស់លោក បានសម្រេចចិត្តលុបចោលកិច្ចព្រមព្រៀងឈប់បាញ់ ដោយទុកអ្នកជាប់ឃុំនៅតំបន់ហ្កាហ្សា ប្រឈមហានិភ័យនៃជោគវាសនាដែលមិនអាចដឹងបាន។

ក្រសួងការពារជនស៊ីវិលនៅហ្កាហ្សាបាននិយាយថា មនុស្សមួយចំនួនត្រូវបានជាប់នៅក្រោមគំនរបាក់បែកនៃផ្ទះសម្បែងដែលត្រូវបានបំផ្លិចបំផ្លាញដោយការទម្លាក់គ្រាប់បែកនៅក្នុងតំបន់ផ្សេងៗ ក្នុងដែនដីរងការឡោមព័ទ្ធមួយនេះ។ អ្នករាយការណ៍ព័ត៌មានរបស់ទូរទស្សន៍ CNNនៅដែនដីហ្កាហ្សា បានរាយការណ៍ពីការវាយប្រហារនៅតាមទីតាំងជាច្រើនក្នុងតំបន់នេះ៕